mere KHush rahne se usko kuchh pareshani na thi

mere ḳhush rahne se us ko kuchh pareshānī na thī

us ko zinda dekh kar mujh ko bhī hairānī na thī

do thake-hāre diloñ ne ik nadī par raat kī

thī magar jazboñ meñ vo pahlī sī tuġhyānī na thī

ruk gayā thā vo mire hujre meñ jaane kis liye

āsmāñ shaffāf thā aur raat tūfānī na thī

teġh-zan ko vaar se pahchān letā thā hadaf

lafz kī ījād se pahle rajaz-ḳhvānī na thī

rafta rafta qahqahoñ ke rañg phīke paḌ ga.e

hoñT the sarsabz lekin vo hañsī dhānī na thī

ek se dīvār-o-dar ko dekhnā thā umr bhar

apnī āñkhoñ ke muqaddar meñ jahāñbānī na thī

vaqt mahñgā ho rahā thā lafz bhī kamyāb the

shā.iroñ ko ḳhvāb bunñe meñ bhī āsānī na thī

mere KHush rahne se us ko kuchh pareshani na thi

us ko zinda dekh kar mujh ko bhi hairani na thi

do thake-haare dilon ne ek nadi par raat ki

thi magar jazbon mein wo pahli si tughyani na thi

ruk gaya tha wo mere hujre mein jaane kis liye

aasman shaffaf tha aur raat tufani na thi

tegh-zan ko war se pahchan leta tha hadaf

lafz ki ijad se pahle rajaz-KHwani na thi

rafta rafta qahqahon ke rang phike paD gae

honT the sarsabz lekin wo hansi dhani na thi

ek se diwar-o-dar ko dekhna tha umr bhar

apni aankhon ke muqaddar mein jahanbani na thi

waqt mahnga ho raha tha lafz bhi kamyab the

shairon ko KHwab bunne mein bhi aasani na thi