mere lab par hansi jo aai hai

mere lab par hañsī jo aa.ī hai

vo bhī apnī nahīñ parā.ī hai

kyā bharosa kare vo phūloñ par

jis ne ḳhushbū se choT khaa.ī hai

maan lī haar us ne bādal se

ye to sūraj kī jag-hañsā.ī hai

band haiñ saarī khiḌkiyāñ ghar kī

ai havā tū kidhar se aa.ī hai

bijliyoñ ko sazā na de bādal

aag to barf ne lagā.ī hai

kyā kisī ko dikhā.e muñh tūfāñ

maat us ne diye se khaa.ī hai

ai zamīñ tū na kūdnā is meñ

chāñd sūraj kī vo laḌā.ī hai

pyaas se baat tak na kī us ne

ye to dariyā kī kaj-adā.ī hai

ai 'qamar' merī ek ek ġhazal

mere taḳh.īl kī kamā.ī hai

mere lab par hansi jo aai hai

wo bhi apni nahin parai hai

kya bharosa kare wo phulon par

jis ne KHushbu se choT khai hai

man li haar us ne baadal se

ye to suraj ki jag-hansai hai

band hain sari khiDkiyan ghar ki

ai hawa tu kidhar se aai hai

bijliyon ko saza na de baadal

aag to barf ne lagai hai

kya kisi ko dikhae munh tufan

mat us ne diye se khai hai

ai zamin tu na kudna is mein

chand suraj ki wo laDai hai

pyas se baat tak na ki us ne

ye to dariya ki kaj-adai hai

ai 'qamar' meri ek ek ghazal

mere taKHil ki kamai hai