mere liye hazar kare ehtimam hirs

mere liye hazār kare ehtimām hirs

maiñ vo hoñ mujh pe Daal sakegī na daam hirs

hai kuchh na kuchh har aadmī ko lā-kalām hirs

lekin na is qadar ki banā le ġhulām hirs

ai zulf phail phail ke ruḳhsār ko na Dhāñk

kar nīm-roz kī na shah-e-mulk-e-shām hirs

vaa.iz sharāb-o-hūr kī ulfat meñ ġharq hai

hai sar se paañv tak ye sitam-gar tamām hirs

dil chhīn āshiqoñ ke magar hoshiyār rah

aisā na ho ki dil ko banā le ġhulām hirs

nāqis raheñge saare talavvun se kārobār

karne na degī tujh ko yahāñ koī kaam hirs

qabza uThā.egī na dil-e-rozgār se

jab tak na zindagī kā kare iḳhtitām hirs

muddat se ishtiyāq hai bos-o-kanār kā

gar hukm ho shurūa kare apnā kaam hirs

'parvīñ' lagī huī hai ḳhudā se mujhe umiid

dil ko mire banā.e na apnā ġhulām hirs

mere liye hazar kare ehtimam hirs

main wo hon mujh pe Dal sakegi na dam hirs

hai kuchh na kuchh har aadmi ko la-kalam hirs

lekin na is qadar ki bana le ghulam hirs

ai zulf phail phail ke ruKHsar ko na Dhank

kar nim-roz ki na shah-e-mulk-e-sham hirs

waiz sharab-o-hur ki ulfat mein gharq hai

hai sar se panw tak ye sitam-gar tamam hirs

dil chhin aashiqon ke magar hoshiyar rah

aisa na ho ki dil ko bana le ghulam hirs

naqis rahenge sare talawwun se karobar

karne na degi tujh ko yahan koi kaam hirs

qabza uThaegi na dil-e-rozgar se

jab tak na zindagi ka kare iKHtitam hirs

muddat se ishtiyaq hai bos-o-kanar ka

gar hukm ho shurua kare apna kaam hirs

'parwin' lagi hui hai KHuda se mujhe umid

dil ko mere banae na apna ghulam hirs