mere sang-e-mazar par farhad

mere sañg-e-mazār par farhād

rakh ke tesha kahe hai yā ustād

ham se bin marg kyā judā ho malāl

jaan ke saath hai dil-e-nāshād

muuñd āñkheñ safar adam kā kar

bas hai dekhā na ālam-e-ījād

fikr-e-tāmīr meñ na rah mun.im

zindagānī kī kuchh bhī hai buniyād

ḳhaak bhī sar pe Dālne ko nahīñ

kis ḳharābe meñ ham hue ābād

sunte ho Tuk suno ki phir mujh baad

na sunoge ye naala o fariyād

lagtī hai kuchh sumūm sī to nasīm

ḳhaak kis diljale kī barbād

bhūlā jaa.e hai ġham-e-butāñ meñ jī

ġharaz aatā hai phir ḳhudā hī yaad

tere qaid-e-qafas kā kyā shikva

naale apne se apne se fariyād

har taraf haiñ asiir ham-āvāz

baaġh hai ghar tirā to ai sayyād

ham ko marnā ye hai ki kab hoñ kahīñ

apnī qaid-e-hayāt se āzād

aisā vo shoḳh hai ki uThte sub.h

jaanā so jaa.e us kī hai mo'tād

nahīñ sūrat-pazīr naqsh us kā

yuuñ hī tasdīq khīñche hai bahzād

ḳhuub hai ḳhaak se buzurgoñ kī

chāhnā to mire ta.iiñ imdād

par muravvat kahāñ kī hai ai 'mīr'

tū hī mujh diljale ko kar irshād

nā-murādī ho jis pe parvāna

vo jalātā phire charāġh-e-murād

mere sang-e-mazar par farhad

rakh ke tesha kahe hai ya ustad

hum se bin marg kya juda ho malal

jaan ke sath hai dil-e-nashad

mund aankhen safar adam ka kar

bas hai dekha na aalam-e-ijad

fikr-e-tamir mein na rah munim

zindagani ki kuchh bhi hai buniyaad

KHak bhi sar pe Dalne ko nahin

kis KHarabe mein hum hue aabaad

sunte ho Tuk suno ki phir mujh baad

na sunoge ye nala o fariyaad

lagti hai kuchh sumum si to nasim

KHak kis diljale ki barbaad

bhula jae hai gham-e-butan mein ji

gharaz aata hai phir KHuda hi yaad

tere qaid-e-qafas ka kya shikwa

nale apne se apne se fariyaad

har taraf hain asir ham-awaz

bagh hai ghar tera to ai sayyaad

hum ko marna ye hai ki kab hon kahin

apni qaid-e-hayat se aazad

aisa wo shoKH hai ki uThte subh

jaana so jae us ki hai mo'tad

nahin surat-pazir naqsh us ka

yun hi tasdiq khinche hai bahzad

KHub hai KHak se buzurgon ki

chahna to mere tain imdad

par murawwat kahan ki hai ai 'mir'

tu hi mujh diljale ko kar irshad

na-muradi ho jis pe parwana

wo jalata phire charagh-e-murad