mere zehn-o-dil mein fikr-o-fan mein tha

mere zehn-o-dil meñ fikr-o-fan meñ thā

niim kā vo peḌ jo āñgan meñ thā

jis pe likkhā thā mirā nām-o-nasab

qaid maiñ miTTī ke us bartan meñ thā

ek vo har dasht meñ sairāb thā

ek maiñ pyāsā har ik sāvan meñ thā

dekh kar bhī jo na dekhā jā sakā

aks-ārā vo har ik darpan meñ thā

kah na paayā jaane kyuuñ ik harf bhī

jaane kyā us aadmī ke man meñ thā

jis ko koī naam de saktā nahīñ

vo bulāvā us parā.e-pan meñ thā

āñdhiyāñ sab kuchh uḌā kar le ga.iiñ

peḌ par patta na phal dāman meñ thā

jā-ba-jā qaus-e-quzah kī chhūT thī

ik tilism ābād pairāhan meñ thā

chhīn kar 'shādāb' koī le gayā

ik anokhā sukh jo ghar-āñgan meñ thā

mere zehn-o-dil mein fikr-o-fan mein tha

nim ka wo peD jo aangan mein tha

jis pe likkha tha mera nam-o-nasab

qaid main miTTi ke us bartan mein tha

ek wo har dasht mein sairab tha

ek main pyasa har ek sawan mein tha

dekh kar bhi jo na dekha ja saka

aks-ara wo har ek darpan mein tha

kah na paya jaane kyun ek harf bhi

jaane kya us aadmi ke man mein tha

jis ko koi nam de sakta nahin

wo bulawa us parae-pan mein tha

aandhiyan sab kuchh uDa kar le gain

peD par patta na phal daman mein tha

ja-ba-ja qaus-e-quzah ki chhuT thi

ek tilism aabaad pairahan mein tha

chhin kar 'shadab' koi le gaya

ek anokha sukh jo ghar-angan mein tha