meri aankhon se guzar kar dil o jaan mein aana

merī āñkhoñ se guzar kar dil o jaañ meñ aanā

jism meñ Dhal ke mirī rūh-e-ravāñ meñ aanā

kho na jaanā mirī jaañ sarhad-e-jāñ tak aa ke

qurb kā paas liye buad-e-karāñ meñ aanā

maiñ tire husn ko ra.anā.ī-e-ma.anī de duuñ

tū kisī shab mire andāz-e-bayāñ meñ aanā

saath chalne ko rafīq-e-rah-e-duniyā haiñ bahut

tū mire saath mire apne jahāñ meñ aanā

lā-makāñ sher kī bandish meñ simaTnā pal bhar

āsmāñ ā.īna-e-āb-e-ravāñ meñ aanā

ishq ne dekh liye husn meñ āfāq tamām

ek sakte kā vo umr-e-guzrāñ meñ aanā

zīnat-e-dast-e-hinā.ī hai yahī duzd-e-hinā

ġhaib kā ma.araza-e-vaqt-o-makāñ meñ aanā

tishna-e-nūr mirī fikr ke mahtāb o nujūm

mire ḳhurshīd mirī kāhkashāñ meñ aanā

meri aankhon se guzar kar dil o jaan mein aana

jism mein Dhal ke meri ruh-e-rawan mein aana

kho na jaana meri jaan sarhad-e-jaan tak aa ke

qurb ka pas liye buad-e-karan mein aana

main tere husn ko ranai-e-mani de dun

tu kisi shab mere andaz-e-bayan mein aana

sath chalne ko rafiq-e-rah-e-duniya hain bahut

tu mere sath mere apne jahan mein aana

la-makan sher ki bandish mein simaTna pal bhar

aasman aaina-e-ab-e-rawan mein aana

ishq ne dekh liye husn mein aafaq tamam

ek sakte ka wo umr-e-guzran mein aana

zinat-e-dast-e-hinai hai yahi duzd-e-hina

ghaib ka maraza-e-waqt-o-makan mein aana

tishna-e-nur meri fikr ke mahtab o nujum

mere KHurshid meri kahkashan mein aana