meri ankhon ka sukun dil ke ujale mere

merī añkhoñ kā sukūñ dil ke ujāle mere

bas ga.e jaane kahāñ chāhne vaale mere

koī is dasht meñ qālīn bichhāne se rahā

liye phirte haiñ kahāñ paañv ke chhāle mere

terī sohbat meñ ḳhushī kā to Thikāna hī na thā

ab sañbhalte hī nahīñ ashk sañbhāle mere

mujh ko āvāz lagātā hai junūñ manzil kā

koī ab paañv meñ zanjīr na Daale mere

ap aa.e hī nahīñ qasr-e-anā se bāhar

aur galiyoñ meñ bhaTakte rahe naale mere

merī añkhoñ meñ raheñge to bikhar jā.eñge

apnī palkoñ pe koī ḳhvāb sajā le mere

zar luTāne meñ tumheñ dard bhī ho kyoñ beTe

tum ne dekhe hī kahāñ haath ke chhāle mere

aaj phirte haiñ jo Dasne ke liye ai 'dānish'

kyā batā.ūñ ki ye sab saañp haiñ paale mere

meri ankhon ka sukun dil ke ujale mere

bas gae jaane kahan chahne wale mere

koi is dasht mein qalin bichhane se raha

liye phirte hain kahan panw ke chhaale mere

teri sohbat mein KHushi ka to Thikana hi na tha

ab sanbhalte hi nahin ashk sanbhaale mere

mujh ko aawaz lagata hai junun manzil ka

koi ab panw mein zanjir na Dale mere

ap aae hi nahin qasr-e-ana se bahar

aur galiyon mein bhaTakte rahe nale mere

meri ankhon mein rahenge to bikhar jaenge

apni palkon pe koi KHwab saja le mere

zar luTane mein tumhein dard bhi ho kyon beTe

tum ne dekhe hi kahan hath ke chhaale mere

aaj phirte hain jo Dasne ke liye ai 'danish'

kya bataun ki ye sab sanp hain pale mere