meri duniya mein abhi raqs-e-sharar hota hai

merī duniyā meñ abhī raqs-e-sharar hotā hai

jo bhī hotā hai ba-andāz-e-digar hotā hai

bhuul jaate haiñ tire chāhne vaale tujh ko

is qadar saḳht ye hastī kā safar hotā hai

ab na vo josh-e-vafā hai na vo andāz-e-talab

ab bhī lekin tire kūche se guzar hotā hai

dil meñ armān the kyā ahd-e-bahārāñ ke liye

chāk-e-gul dekh ke ab chāk-e-jigar hotā hai

ham to hañste bhī haiñ jī jaan se jaane ke liye

tum jo rote ho to aañsū bhī guhar hotā hai

saiñkaḌoñ zaḳhm use milte haiñ is duniyā se

koī dil terā talabgār agar hotā hai

qāfila luTtā hai jis vaqt sar-e-rāhguzar

us ghaḌī qāfila-sālār kidhar hotā hai

'anjum'-e-soḳhta-jāñ ko hai ḳhushī kī ummīd

raat meñ jaise kabhī rañg-e-sahar hotā hai

meri duniya mein abhi raqs-e-sharar hota hai

jo bhi hota hai ba-andaz-e-digar hota hai

bhul jate hain tere chahne wale tujh ko

is qadar saKHt ye hasti ka safar hota hai

ab na wo josh-e-wafa hai na wo andaz-e-talab

ab bhi lekin tere kuche se guzar hota hai

dil mein arman the kya ahd-e-bahaaran ke liye

chaak-e-gul dekh ke ab chaak-e-jigar hota hai

hum to hanste bhi hain ji jaan se jaane ke liye

tum jo rote ho to aansu bhi guhar hota hai

sainkaDon zaKHm use milte hain is duniya se

koi dil tera talabgar agar hota hai

qafila luTta hai jis waqt sar-e-rahguzar

us ghaDi qafila-salar kidhar hota hai

'anjum'-e-soKHta-jaan ko hai KHushi ki ummid

raat mein jaise kabhi rang-e-sahar hota hai