meri duniya sang-o-ahan unki duniya chand-sitare

merī duniyā sañg-o-āhan un kī duniyā chāñd-sitāre

aql kahāñ tak dāman khīñche ishq kahāñ tak haath pasāre

apnī apnī dhun meñ magan haiñ shāmoñ sub.hoñ ke matvāle

sub.h ke aañsū kaun sukhā.e raat ke gesū kaun sañvāre

ābla-pā rahgīroñ ko jharnoñ se dil bahlāne bhī de

azm-e-javāñ ko aur javāñ kar apnī manzil duur hai pyāre

chham chham chham chham nāchtī maujeñ ye sargoshī kartī jaa.eñ

tūfānoñ kī raah takeñge kab tak ye majbūr kināre

'nūr' aqīdoñ ke sho.aloñ meñ rūheñ jaltī dekh chukī haiñ

tum bhī batāo in āñkhoñ se aañsū Tapkeñ yā añgāre

meri duniya sang-o-ahan un ki duniya chand-sitare

aql kahan tak daman khinche ishq kahan tak hath pasare

apni apni dhun mein magan hain shamon subhon ke matwale

subh ke aansu kaun sukhae raat ke gesu kaun sanware

aabla-pa rahgiron ko jharnon se dil bahlane bhi de

azm-e-jawan ko aur jawan kar apni manzil dur hai pyare

chham chham chham chham nachti maujen ye sargoshi karti jaen

tufanon ki rah takenge kab tak ye majbur kinare

'nur' aqidon ke shoalon mein ruhen jalti dekh chuki hain

tum bhi batao in aankhon se aansu Tapken ya angare