meri hasti raaz ban kar rah gai

merī hastī raaz ban kar rah ga.ī

har adā e.ajāz ban kar rah ga.ī

tuur kī choTī nigāh-e-ishq meñ

nuqta-e-āġhāz ban kar rah ga.ī

shorish-e-duniyā kī hālat kyā kahūñ

karbalā-andāz ban kar rah ga.ī

zikr-e-jānāñ ke ta.assur se nazar

mahram-e-har-rāz ban kar rah ga.ī

kā.enāt-e-dahr meñ āvāz-e-dil

naġhma-e-be-sāz ban kar rah ga.ī

merī duniyā-e-mohabbat kyā kahūñ

bārgāh-e-nāz ban kar rah ga.ī

har nazar har chaal mast-e-nāz kī

barq kā andāz ban kar rah ga.ī

zindagī ai 'tāj' un ke ishq meñ

hāsil-e-sad-nāz ban kar rah ga.ī

meri hasti raaz ban kar rah gai

har ada eajaz ban kar rah gai

tur ki choTi nigah-e-ishq mein

nuqta-e-aghaz ban kar rah gai

shorish-e-duniya ki haalat kya kahun

karbala-andaz ban kar rah gai

zikr-e-jaanan ke tassur se nazar

mahram-e-har-raaz ban kar rah gai

kaenat-e-dahr mein aawaz-e-dil

naghma-e-be-saz ban kar rah gai

meri duniya-e-mohabbat kya kahun

bargah-e-naz ban kar rah gai

har nazar har chaal mast-e-naz ki

barq ka andaz ban kar rah gai

zindagi ai 'taj' un ke ishq mein

hasil-e-sad-naz ban kar rah gai