meri manind KHud-nigar tanha

merī mānind ḳhud-nigar tanhā

ye surāhī meñ phuul nargis kā

itnī sham.eñ thiiñ terī yādoñ kī

apnā saaya bhī apnā saaya na thā

mere nazdīk terī duurī thī

koī manzil thī koī 'ālam thā

haa.e vo zindagī-fareb āñkheñ

tū ne kyā sochā maiñ ne kyā samjhā

sub.h kī dhuup hai ki rastoñ par

munjamid bijliyoñ kā ik dariyā

ghuñgrūoñ kī jhanak-manak meñ basī

terī āhaT! maiñ kis ḳhayāl meñ thā

phir kahīñ dil ke burj par koī 'aks

fāsloñ kī fasīl se ubhrā

phuul murjhā na jaa.eñ bajroñ meñ

māñjhiyo koī giit sāhil kā

vaqt kī sarhadeñ simaT jātīñ

terī duurī se kuchh ba.iid na thā

'umr jaltī hai baḳht jalvoñ ke

ziist miTtī hai bhaag miTTī kā

raheñ dardoñ kī chaukiyāñ chaukas

phuul lohe kī baaḌ par bhī khilā

jo ḳhud un ke diloñ meñ thā tah-e-sang

vo ḳhazāna kisī kisī ko milā

laakh qadreñ thiiñ zindagānī kī

ye muhīt ik 'ajīb zāviya thā

hai jo ye sar pe gyaan kī gaThrī

khol kar bhī ise kabhī dekhā

roz jhuktā hai kū-e-dil kī taraf

kāḳh-e-sad-bām kā koī ziinā

meri manind KHud-nigar tanha

ye surahi mein phul nargis ka

itni shamen thin teri yaadon ki

apna saya bhi apna saya na tha

mere nazdik teri duri thi

koi manzil thi koi 'alam tha

hae wo zindagi-fareb aankhen

tu ne kya socha main ne kya samjha

subh ki dhup hai ki raston par

munjamid bijliyon ka ek dariya

ghungruon ki jhanak-manak mein basi

teri aahaT! main kis KHayal mein tha

phir kahin dil ke burj par koi 'aks

faslon ki fasil se ubhra

phul murjha na jaen bajron mein

manjhiyo koi git sahil ka

waqt ki sarhaden simaT jatin

teri duri se kuchh baid na tha

'umr jalti hai baKHt jalwon ke

zist miTti hai bhag miTTi ka

rahen dardon ki chaukiyan chaukas

phul lohe ki baD par bhi khila

jo KHud un ke dilon mein tha tah-e-sang

wo KHazana kisi kisi ko mila

lakh qadren thin zindagani ki

ye muhit ek 'ajib zawiya tha

hai jo ye sar pe gyan ki gaThri

khol kar bhi ise kabhi dekha

roz jhukta hai ku-e-dil ki taraf

kaKH-e-sad-baam ka koi zina