meri nigah mein yar main uski nigah mein

merī nigah meñ yaar maiñ us kī nigāh meñ

zarre meñ māhtāb hai zarra hai maah meñ

dil meñ hai duud aah to dil dūd-e-āh meñ

abr-e-siyāh ghar meñ ghar abr-e-siyāh meñ

aisā kiyā hai fauj-e-havādis kā sāmnā

hairat meñ hai sipāh to hairat sipāh meñ

phailī huī hai zulf ki chhā.ī huī ghaTā

abr-e-siyāh tum meñ tum abr-e-siyāh meñ

ġham meñ ḳhushī hai aur ḳhushī meñ nihāñ hai ġham

muzmar hai aah vaah meñ aur vaah aah meñ

kyā dekhtā hai mujh ko sarāpā huuñ chashm-e-shauq

merī nigāh tujh pe tū merī nigāh meñ

ashshaiḳh vaqt kyā ye hamārā qusūr hai

lazzat meñ hai gunāh to lazzat gunāh meñ

merī nazar meñ tum ho tumhārī nazar meñ maiñ

merī nigah meñ tum maiñ tumhārī nigāh meñ

shikve meñ shukr shukr meñ shikva milā huā

ye aah merī raah meñ aur vaah aah meñ

maiñ us kā said-e-husn vo merā shikār-e-ishq

us kī nigāh mujh pe vo merī nigāh meñ

dil tum meñ aur dil meñ tum allāh re nasīb

shah maskan-e-gadā meñ gadā qasr-e-shāh meñ

dil bazm-e-yār meñ hai to dil meñ hai bazm-e-yār

mujh meñ hai jalva-gāh to maiñ jalva-gāh meñ

sar aur kulāh donoñ 'saḳhā' be-sabāt haiñ

dam meñ kulāh sar pe na sar hai kulāh meñ

meri nigah mein yar main us ki nigah mein

zarre mein mahtab hai zarra hai mah mein

dil mein hai dud aah to dil dud-e-ah mein

abr-e-siyah ghar mein ghar abr-e-siyah mein

aisa kiya hai fauj-e-hawadis ka samna

hairat mein hai sipah to hairat sipah mein

phaili hui hai zulf ki chhai hui ghaTa

abr-e-siyah tum mein tum abr-e-siyah mein

gham mein KHushi hai aur KHushi mein nihan hai gham

muzmar hai aah wah mein aur wah aah mein

kya dekhta hai mujh ko sarapa hun chashm-e-shauq

meri nigah tujh pe tu meri nigah mein

ashshaiKH waqt kya ye hamara qusur hai

lazzat mein hai gunah to lazzat gunah mein

meri nazar mein tum ho tumhaari nazar mein main

meri nigah mein tum main tumhaari nigah mein

shikwe mein shukr shukr mein shikwa mila hua

ye aah meri rah mein aur wah aah mein

main us ka said-e-husn wo mera shikar-e-ishq

us ki nigah mujh pe wo meri nigah mein

dil tum mein aur dil mein tum allah re nasib

shah maskan-e-gada mein gada qasr-e-shah mein

dil bazm-e-yar mein hai to dil mein hai bazm-e-yar

mujh mein hai jalwa-gah to main jalwa-gah mein

sar aur kulah donon 'saKHa' be-sabaat hain

dam mein kulah sar pe na sar hai kulah mein