meri rifat par jo hairan hai to hairani nahin

merī rif.at par jo hairāñ hai to hairānī nahīñ

tū abhī insān kī azmat kā irfānī nahīñ

aur ye kyā hai zabt jo soz-e-pinhānī nahīñ

aag raushan dil meñ hai chehre pe tābānī nahīñ

phuul ke patte bikhar kar ik fasāna kah ga.e

jis kī ho tartīb mumkin vo pareshānī nahīñ

mujh par ik ilzām hai qaid-e-qafas vo bhī ġhalat

jis kī nīyat meñ ho āzādī vo zindānī nahīñ

josh-e-girya us par aahoñ kī ye sailābī havā

kaun sī hai mauj-e-ashk aisī jo tūfānī nahīñ

raaz ye mujh par shikast-e-ġhuncha-o-gul se khulā

husn bhī to be-niyāz-e-chāk-dāmānī nahīñ

ḳhvāhishoñ ke saath apne nafs ko bhī kar fanā

zindagī meñ is se behtar koī qurbānī nahīñ

ittifāqāt-e-mohabbat ne ye sābit kar diyā

vo bhī peshānī meñ hai shāyad jo pesh aanī nahīñ

daulat-e-kaunain se bhī hai girāñ-tar ik sukūñ

dil ho mustaġhnī to parvā-e-jahāñbānī nahīñ

jāvedānī huuñ maiñ ai duniyā parastish kar mirī

ye musallam hai ki tū faanī hai maiñ faanī nahīñ

hausloñ ke saath tai kar rāh-e-dushvār-e-hayāt

hal to hoñgī mushkileñ lekin ba-āsānī nahīñ

dekh ai saaqī qanā.at kī tarab-afshāniyāñ

āb-e-kausar hai kaTore meñ mire paanī nahīñ

hai mirī nazroñ meñ anjām-e-bahār-e-gulsitāñ

ab mire sar meñ havā-e-gul badāmānī nahīñ

bah chukā hai ḳhuun paanī kī tarah insān kā

mo'tadil phir bhī mizāj-e-ālam-fānī nahīñ

kar na ai kunj-e-lahad zahmat mire ārām kī

maiñ mujāhid huuñ mujhe ḳhu-e-tan-āsānī nahīñ

kar rahā huuñ nazm ai 'sīmāb' qur.ān-e-majīd

aur ye kyā hai agar tā.īd-e-yazdānī nahīñ

meri rifat par jo hairan hai to hairani nahin

tu abhi insan ki azmat ka irfani nahin

aur ye kya hai zabt jo soz-e-pinhani nahin

aag raushan dil mein hai chehre pe tabani nahin

phul ke patte bikhar kar ek fasana kah gae

jis ki ho tartib mumkin wo pareshani nahin

mujh par ek ilzam hai qaid-e-qafas wo bhi ghalat

jis ki niyat mein ho aazadi wo zindani nahin

josh-e-girya us par aahon ki ye sailabi hawa

kaun si hai mauj-e-ashk aisi jo tufani nahin

raaz ye mujh par shikast-e-ghuncha-o-gul se khula

husn bhi to be-niyaz-e-chaak-damani nahin

KHwahishon ke sath apne nafs ko bhi kar fana

zindagi mein is se behtar koi qurbani nahin

ittifaqat-e-mohabbat ne ye sabit kar diya

wo bhi peshani mein hai shayad jo pesh aani nahin

daulat-e-kaunain se bhi hai giran-tar ek sukun

dil ho mustaghni to parwa-e-jahanbani nahin

jawedani hun main ai duniya parastish kar meri

ye musallam hai ki tu fani hai main fani nahin

hauslon ke sath tai kar rah-e-dushwar-e-hayat

hal to hongi mushkilen lekin ba-asani nahin

dekh ai saqi qanaat ki tarab-afshaniyan

aab-e-kausar hai kaTore mein mere pani nahin

hai meri nazron mein anjam-e-bahaar-e-gulsitan

ab mere sar mein hawa-e-gul badamani nahin

bah chuka hai KHun pani ki tarah insan ka

mo'tadil phir bhi mizaj-e-alam-fani nahin

kar na ai kunj-e-lahad zahmat mere aaram ki

main mujahid hun mujhe KHu-e-tan-asani nahin

kar raha hun nazm ai 'simab' quran-e-majid

aur ye kya hai agar taid-e-yazdani nahin