meri tarif kare ya mujhe bad-nam kare

merī tārīf kare yā mujhe bad-nām kare

jis ne jo baat bhī karnī hai sar-e-ām kare

zaḳhm par vaqt kā marham to lagā detī hai

aur kyā is ke sivā gardish-e-ayyām kare

mohtasib se maiñ akelā hī nimaT saktā huuñ

jis ne jo jurm kiyā hai vo mire naam kare

vo mirī soch se ḳhā.if hai to us se kahnā

mujh meñ uḌte hue taa.ir ko tah-e-dām kare

kaun aa.egā pa.e-pursish-e-ahvāl yahāñ

kis kī ḳhātir koī taz.īn-e-dar-o-bām kare

mujh ko bhī ho mirī auqāt kā kuchh andāza

koī to sūrat-e-yūsuf mujhe nīlām kare

meri tarif kare ya mujhe bad-nam kare

jis ne jo baat bhi karni hai sar-e-am kare

zaKHm par waqt ka marham to laga deti hai

aur kya is ke siwa gardish-e-ayyam kare

mohtasib se main akela hi nimaT sakta hun

jis ne jo jurm kiya hai wo mere nam kare

wo meri soch se KHaif hai to us se kahna

mujh mein uDte hue tair ko tah-e-dam kare

kaun aaega pae-pursish-e-ahwal yahan

kis ki KHatir koi tazin-e-dar-o-baam kare

mujh ko bhi ho meri auqat ka kuchh andaza

koi to surat-e-yusuf mujhe nilam kare