mir dariya hai sune sher zabani uski

'mīr' dariyā hai sune sher zabānī us kī

allāh allāh re tabī.at kī ravānī us kī

ḳhātir-e-bādiya se dair meñ jāvegī kahīñ

ḳhaak mānind bagūle ke uḌānī us kī

ek hai ahd meñ apne vo parāgañda-mizāj

apnī āñkhoñ meñ na aayā koī saanī us kī

meñh to bauchhār kā dekhā hai baraste tum ne

isī andāz se thī ashk-fishānī us kī

baat kī tarz ko dekho to koī jaadū thā

par milī ḳhaak meñ kyā sehr-bayānī us kī

kar ke tāvīz rakheñ us ko bahut bhātī hai

vo nazar paañv pe vo baat divānī us kī

us kā vo ijz tumhārā ye ġhurūr-e-ḳhūbī

minnateñ un ne bahut kiiñ pa na maanī us kī

kuchh likhā hai tujhe har barg pe ai rashk-e-bahār

ruq.a vāreñ haiñ ye aurāq-e-ḳhizānī us kī

sarguzisht apnī kis andoh se shab kahtā thā

so ga.e tum na sunī aah kahānī us kī

marsiye dil ke ka.ī kah ke diye logoñ ko

shahr-e-dillī meñ hai sab paas nishānī us kī

miyān se niklī hī paḌtī thī tumhārī talvār

kyā evaz chaah kā thā ḳhasmi-e-jānī us kī

aable kī sī tarah Thes lagī phuuT bahe

dardmandī meñ ga.ī saarī javānī us kī

ab ga.e us ke juz afsos nahīñ kuchh hāsil

haif sad haif ki kuchh qadr na jaanī us kī

'mir' dariya hai sune sher zabani us ki

allah allah re tabiat ki rawani us ki

KHatir-e-baadiya se dair mein jawegi kahin

KHak manind bagule ke uDani us ki

ek hai ahd mein apne wo paraganda-mizaj

apni aankhon mein na aaya koi sani us ki

meinh to bauchhaar ka dekha hai baraste tum ne

isi andaz se thi ashk-fishani us ki

baat ki tarz ko dekho to koi jadu tha

par mili KHak mein kya sehr-bayani us ki

kar ke tawiz rakhen us ko bahut bhati hai

wo nazar panw pe wo baat diwani us ki

us ka wo ijz tumhaara ye ghurur-e-KHubi

minnaten un ne bahut kin pa na mani us ki

kuchh likha hai tujhe har barg pe ai rashk-e-bahaar

ruqa waren hain ye auraq-e-KHizani us ki

sarguzisht apni kis andoh se shab kahta tha

so gae tum na suni aah kahani us ki

marsiye dil ke kai kah ke diye logon ko

shahr-e-dilli mein hai sab pas nishani us ki

miyan se nikli hi paDti thi tumhaari talwar

kya ewaz chah ka tha KHasmi-e-jaani us ki

aable ki si tarah Thes lagi phuT bahe

dardmandi mein gai sari jawani us ki

ab gae us ke juz afsos nahin kuchh hasil

haif sad haif ki kuchh qadr na jaani us ki