mir-e-sipah na-saza lashkariyan shikasta saf

mīr-e-sipāh nā-sazā lashkariyāñ shikasta saf

aah vo tīr-e-nīm-kash jis kā na ho koī hadaf

tere muhīt meñ kahīñ gauhar-e-zindagī nahīñ

DhūñD chukā maiñ mauj mauj dekh chukā sadaf sadaf

ishq-e-butāñ se haath uThā apnī ḳhudī meñ Duub jā

naqsh o nigār-e-dair meñ ḳhūn-e-jigar na kar talaf

khol ke kyā bayāñ karūñ sirr-e-maqām-e-marg o ishq

ishq hai marg-e-bā-sharaf marg hayāt-e-be-sharaf

sohbat-e-pīr-e-rūm se mujh pe huā ye raaz faash

laakh hakīm sar-ba-jeb ek kalīm sar-ba-kaf

misl-e-kalīm ho agar mārka aazmā koī

ab bhī daraḳht-e-tūr se aatī hai bāñg-e-lā-taḳhaf

ḳhīra na kar sakā mujhe jalva-e-dānish-e-farañg

surma hai merī aañkh kā ḳhāk-e-madīna-o-najaf

mir-e-sipah na-saza lashkariyan shikasta saf

aah wo tir-e-nim-kash jis ka na ho koi hadaf

tere muhit mein kahin gauhar-e-zindagi nahin

DhunD chuka main mauj mauj dekh chuka sadaf sadaf

ishq-e-butan se hath uTha apni KHudi mein Dub ja

naqsh o nigar-e-dair mein KHun-e-jigar na kar talaf

khol ke kya bayan karun sirr-e-maqam-e-marg o ishq

ishq hai marg-e-ba-sharaf marg hayat-e-be-sharaf

sohbat-e-pir-e-rum se mujh pe hua ye raaz fash

lakh hakim sar-ba-jeb ek kalim sar-ba-kaf

misl-e-kalim ho agar marka aazma koi

ab bhi daraKHt-e-tur se aati hai bang-e-la-taKHaf

KHira na kar saka mujhe jalwa-e-danish-e-farang

surma hai meri aankh ka KHak-e-madina-o-najaf