mizan-e-fan pe rakh kar sanche mein Dhaalte hain

mīzān-e-fan pe rakh kar sāñche meñ Dhālte haiñ

chashm-e-ġhazal se shā.ir kājal nikālte haiñ

dāman pe daaġh un ke ham ne unhīñ ke dekhe

kīchaḌ jo dūsroñ par aksar uchhālte haiñ

apnoñ ne to girāyā har baar har Dagar par

ehsāñ hai dushmanoñ kā ham ko sambhālte haiñ

bīmār ḳhvāhishoñ kī takmīl ke liye hī

insān uljhanoñ meñ kyoñ ḳhud ko Dālte haiñ

sanjīda ho ke kab vo bāteñ mirī suneñge

kyā kah rahe ho kah kar aksar jo Tālte haiñ

'ġhālib' sā 'mīr' jaisā andāz kab milegā

alfāz ke samundar ham bhī khañgālte haiñ

shīshe ke ghar haiñ jin ke aksar yahāñ vo 'sānī'

patthar hamārī jānib phir kyoñ uchhālte haiñ

mizan-e-fan pe rakh kar sanche mein Dhaalte hain

chashm-e-ghazal se shair kajal nikalte hain

daman pe dagh un ke hum ne unhin ke dekhe

kichaD jo dusron par aksar uchhaalte hain

apnon ne to giraya har bar har Dagar par

ehsan hai dushmanon ka hum ko sambhaalte hain

bimar KHwahishon ki takmil ke liye hi

insan uljhanon mein kyon KHud ko Dalte hain

sanjida ho ke kab wo baaten meri sunenge

kya kah rahe ho kah kar aksar jo Talte hain

'ghaalib' sa 'mir' jaisa andaz kab milega

alfaz ke samundar hum bhi khangalte hain

shishe ke ghar hain jin ke aksar yahan wo 'sani'

patthar hamari jaanib phir kyon uchhaalte hain