mil bhi jaegi rahat munharif zamane se

mil bhī jā.egī rāhat munharif zamāne se

sochnā bhī hai pahle āshiyāñ banāne se

is liye mohabbat meñ rāhatoñ kā munkir huuñ

zindagī na miT jaa.e naqsh-e-ġham miTāne se

gulsitāñ meñ kyā Dāleñ vo binā nasheman kī

laag bijliyoñ ko hai jin ke āshiyāne se

dāġh-e-dil kī afzā.ish rū-kash-e-gulistāñ hai

har bahār sharminda is bahār-ḳhāne se

aaj barbat-e-dil par kaun ye ġhazal-ḳhvāñ hai

zindagī-e-ulfat kī nabz hai Thikāne se

mustaqil ḳhudā rakkhe kaash in bahāroñ ko

zindagī mahak uTThī tere muskurāne se

ye bache bhī ai 'kāmil' haiñ sharīr kis darja

le chale haiñ zāhid ko vaa'z ke bahāne se

mil bhi jaegi rahat munharif zamane se

sochna bhi hai pahle aashiyan banane se

is liye mohabbat mein rahaton ka munkir hun

zindagi na miT jae naqsh-e-gham miTane se

gulsitan mein kya Dalen wo bina nasheman ki

lag bijliyon ko hai jin ke aashiyane se

dagh-e-dil ki afzaish ru-kash-e-gulistan hai

har bahaar sharminda is bahaar-KHane se

aaj barbat-e-dil par kaun ye ghazal-KHwan hai

zindagi-e-ulfat ki nabz hai Thikane se

mustaqil KHuda rakkhe kash in bahaaron ko

zindagi mahak uTThi tere muskurane se

ye bache bhi ai 'kaamil' hain sharir kis darja

le chale hain zahid ko wa'z ke bahane se