mil jaen izhdiham mein hum hi ye humse dur

mil jaa.eñ izhdihām meñ ham hī ye ham se duur

ik ghar judā banā.eñge dair-o-haram se duur

jitne qadam ziyāda hoñ utnā ziyāda ajr

ghar barhaman kā chāhiye bait-us-sanam se duur

shaddād shukr kar ki ga.ī dar pe terī jaan

jab thā maqām-e-shikva ki martā iram se duur

pairav huuñ garche pās-e-adab bhī zarūr hai

rakhtā huuñ paañv ḳhizr ke naqsh-e-qadam se duur

chāhūñ ki haal vahshat-e-dil kuchh raqam karūñ

bhāgeñ hurūf vaqt-e-nigārish qalam se duur

dekhā hai dām-o-dāna kā dastūr yaañ nayā

ḳhāl-e-zaqan hī turra-e-pur-pech-o-ḳham se duur

dam bhar meñ jā pahuñchte haiñ yaañ ke muqīm vaañ

ye marhala nahīñ hai savād-e-adam se duur

haiñ khel sab munāfī-e-shaukat ki ahl-e-jāh

rah jaate haiñ shikār meñ ḳhail-o-hasham se duur

'nāzim' ye taar bijlī ke nikle hai raah ḳhuub

bāteñ kareñge yaar ho kitnā hī ham se duur

mil jaen izhdiham mein hum hi ye hum se dur

ek ghar juda banaenge dair-o-haram se dur

jitne qadam ziyaada hon utna ziyaada ajr

ghar barhaman ka chahiye bait-us-sanam se dur

shaddad shukr kar ki gai dar pe teri jaan

jab tha maqam-e-shikwa ki marta iram se dur

pairaw hun garche pas-e-adab bhi zarur hai

rakhta hun panw KHizr ke naqsh-e-qadam se dur

chahun ki haal wahshat-e-dil kuchh raqam karun

bhagen huruf waqt-e-nigarish qalam se dur

dekha hai dam-o-dana ka dastur yan naya

KHal-e-zaqan hi turra-e-pur-pech-o-KHam se dur

dam bhar mein ja pahunchte hain yan ke muqim wan

ye marhala nahin hai sawad-e-adam se dur

hain khel sab munafi-e-shaukat ki ahl-e-jah

rah jate hain shikar mein KHail-o-hasham se dur

'nazim' ye tar bijli ke nikle hai rah KHub

baaten karenge yar ho kitna hi hum se dur