mil-jul kar iman KHuda par la sakte hain

mil-jul kar īmān ḳhudā par lā sakte haiñ

ik jannat meñ bhuuk aur pyaas samā sakte haiñ

aap agar samjhā deñ ḳhāl-o-ḳhad manzar ke

ham apnī hairat kā naam batā sakte haiñ

mere khaliyānoñ se uThte aag ke sho.ale

jhoñke tere bāġhoñ tak phailā sakte haiñ

kamre ke dam ghuT jaane kā ḳhauf na ho to

ham apnī tanhā.ī ko dohrā sakte haiñ

niiñd uḌā sakte haiñ dushman ke lashkar kī

malika ke ḳhvāboñ se phuul churā sakte haiñ

aap agar palkoñ kī chaukhaT tak aa jaa.eñ

ham apnī tasvīr se bāhar aa sakte haiñ

lamha itnī gunjā.ish rakhtā hai ḳhud meñ

aap is meñ aane se pahle jā sakte haiñ

ham bechain khilaune ik din muuD meñ aa kar

jismoñ ke show-case se bāhar aa sakte haiñ

kar sakte haiñ dariyā ko ik misre meñ qaid

aur sahrā ko ghar kī raah dikhā sakte haiñ

palkoñ kī darzoñ se jhāñkne vaale ik din

ruḳhsāroñ par aa kar shor machā sakte haiñ

mil-jul kar iman KHuda par la sakte hain

ek jannat mein bhuk aur pyas sama sakte hain

aap agar samjha den KHal-o-KHad manzar ke

hum apni hairat ka nam bata sakte hain

mere khaliyanon se uThte aag ke shoale

jhonke tere baghon tak phaila sakte hain

kamre ke dam ghuT jaane ka KHauf na ho to

hum apni tanhai ko dohra sakte hain

nind uDa sakte hain dushman ke lashkar ki

malika ke KHwabon se phul chura sakte hain

aap agar palkon ki chaukhaT tak aa jaen

hum apni taswir se bahar aa sakte hain

lamha itni gunjaish rakhta hai KHud mein

aap is mein aane se pahle ja sakte hain

hum bechain khilaune ek din muD mein aa kar

jismon ke show-case se bahar aa sakte hain

kar sakte hain dariya ko ek misre mein qaid

aur sahra ko ghar ki rah dikha sakte hain

palkon ki darzon se jhankne wale ek din

ruKHsaron par aa kar shor macha sakte hain