mil mujhse ai pari tujhe quran ki qasam

mil mujh se ai parī tujhe qur.ān kī qasam

detā huuñ tujh ko taḳht-e-sulaimān kī qasam

karr-o-bayoñ kī tujh ko qasam aur 'arsh kī

jibrīl kī qasam tujhe rizvān kī qasam

tuubā kī salsabīl kī kausar ke jaam kī

hūr-o-qusūr-o-jannat-o-ġhilmān kī qasam

rūhul-qudus kī tujh ko qasam aur masīh kī

mariyam ke tujh ko iffat-e-dāmān kī qasam

tauret kī qasam qasam injīl kī tujhe

tujh ko qasam zabūr kī furqān kī qasam

tujh ko mohammad-e-arabī kī qasam hai aur

maulā-alī kī shāh-e-ḳhurāsāñ kī qasam

millat meñ jis kī tū huī us kī qasam tujhe

aur apne diin maz.hab-o-īmān kī qasam

dāmāñ ko merī haath se us raat mat jhaTak

tujh ko sahar ke chāk-e-garebān kī qasam

muddat se terī chāh-e-zaqan meñ ġharīq huuñ

billāh mujh ko yūsuf-e-kan.ān kī qasam

qaidī huuñ maiñ tirā ba-ḳhudā-vandī-e-ḳhudā

aur us azīz-e-misr ke zindān kī qasam

muusā kī hai qasam tujhe aur koh-e-tūr kī

nūr-o-faroġh-e-jalva-e-lam.ān kī qasam

nargis kī aañkh kī qasam aur gul ke kaan kī

tujh ko sar-e-azīz-e-gulistān kī qasam

tujh ko qasam hai ġhuncha-e-zambaq ke naak kī

aur shor-e-andalīb-e-ġhazal-ḳhvān kī qasam

sone kī gaa.e kī qasam aur rūd-e-nīl kī

fir'aun kī qasam tujhe hāmān kī qasam

bistar mirā hai ḳhār-e-muġhīlāñ basān-e-qais

lailā kī hai tujhe saf-e-mizhgān kī qasam

aisī baḌī qasam bhī na maane to hai tujhe

tujh ko usī ke shaukat-e-zīshān kī qasam

dev-e-safed kī qasam aur koh-e-qāf kī

bāġh-e-iram kī aur paristān kī qasam

lonā-chamārī kī qasam aur kallū-abīr kī

kālī-balā kī ġhūl-e-bayābān kī qasam

qasmeñ to saarī ho chukīñ baaqī rahī hai ab

pīpal tale ke bhutne kī shaitān kī qasam

haañ phir tū kahiyo haa.e vo kis tarah ho.e ġhazab

'inshā' na chheḌ mujh ko mirī jaan kī qasam

mil mujh se ai pari tujhe quran ki qasam

deta hun tujh ko taKHt-e-sulaiman ki qasam

karr-o-bayon ki tujh ko qasam aur 'arsh ki

jibril ki qasam tujhe rizwan ki qasam

tuba ki salsabil ki kausar ke jam ki

hur-o-qusur-o-jannat-o-ghilman ki qasam

ruhul-qudus ki tujh ko qasam aur masih ki

mariyam ke tujh ko iffat-e-daman ki qasam

tauret ki qasam qasam injil ki tujhe

tujh ko qasam zabur ki furqan ki qasam

tujh ko mohammad-e-arabi ki qasam hai aur

maula-ali ki shah-e-KHurasan ki qasam

millat mein jis ki tu hui us ki qasam tujhe

aur apne din mazhab-o-iman ki qasam

daman ko meri hath se us raat mat jhaTak

tujh ko sahar ke chaak-e-gareban ki qasam

muddat se teri chah-e-zaqan mein ghariq hun

billah mujh ko yusuf-e-kanan ki qasam

qaidi hun main tera ba-KHuda-wandi-e-KHuda

aur us aziz-e-misr ke zindan ki qasam

musa ki hai qasam tujhe aur koh-e-tur ki

nur-o-farogh-e-jalwa-e-laman ki qasam

nargis ki aankh ki qasam aur gul ke kan ki

tujh ko sar-e-aziz-e-gulistan ki qasam

tujh ko qasam hai ghuncha-e-zambaq ke nak ki

aur shor-e-andalib-e-ghazal-KHwan ki qasam

sone ki gae ki qasam aur rud-e-nil ki

fir'aun ki qasam tujhe haman ki qasam

bistar mera hai KHar-e-mughilan basan-e-qais

laila ki hai tujhe saf-e-mizhgan ki qasam

aisi baDi qasam bhi na mane to hai tujhe

tujh ko usi ke shaukat-e-zishan ki qasam

dew-e-safed ki qasam aur koh-e-qaf ki

bagh-e-iram ki aur paristan ki qasam

lona-chamari ki qasam aur kallu-abir ki

kali-bala ki ghul-e-bayaban ki qasam

qasmen to sari ho chukin baqi rahi hai ab

pipal tale ke bhutne ki shaitan ki qasam

han phir tu kahiyo hae wo kis tarah hoe ghazab

'insha' na chheD mujh ko meri jaan ki qasam