mile jo mangne se wo KHushi dekhi nahin jati

mile jo māñgne se vo ḳhushī dekhī nahīñ jaatī

na jaane mujh se kyoñ duniyā tirī dekhī nahīñ jaatī

idhar koī kalī chaTkī udhar rone lagī shabnam

kabhī shabnam se phūloñ kī hañsī dekhī nahīñ jaatī

vo sach ko mānte kab haiñ takalluf jin kā sheva hai

jabhī to un se merī sādgī dekhī nahīñ jaatī

añdhere narm-dil haiñ ye chhupā lete haiñ zaḳhmoñ ko

baḌī saffāk hai ye raushnī dekhī nahīñ jaatī

agar iqrār kar loge hamārī jaan jā.egī

ki ham se aap hī apnī ḳhushī dekhī nahīñ jaatī

bujhā detā hai jhap se sham' ko har tagḌā parvāna

yahī sach hai ki is se raushnī dekhī nahīñ jaatī

udāsī hī udāsī ho to āñkheñ band kar lūñgā

ki mujh se is qadar bechārgī dekhī nahīñ jaatī

zamāne bhar kī ḳhushiyāñ tere qadmoñ par luTā dūñgā

ki mujh se terī āñkhoñ meñ namī dekhī nahīñ jaatī

lihāz apne baḌoñ kā bhī nahīñ rakkhā hai jo 'fārūq'

agar hai is qadar barjastagī dekhī nahīñ jaatī

mile jo mangne se wo KHushi dekhi nahin jati

na jaane mujh se kyon duniya teri dekhi nahin jati

idhar koi kali chaTki udhar rone lagi shabnam

kabhi shabnam se phulon ki hansi dekhi nahin jati

wo sach ko mante kab hain takalluf jin ka shewa hai

jabhi to un se meri sadgi dekhi nahin jati

andhere narm-dil hain ye chhupa lete hain zaKHmon ko

baDi saffak hai ye raushni dekhi nahin jati

agar iqrar kar loge hamari jaan jaegi

ki hum se aap hi apni KHushi dekhi nahin jati

bujha deta hai jhap se sham' ko har tagDa parwana

yahi sach hai ki is se raushni dekhi nahin jati

udasi hi udasi ho to aankhen band kar lunga

ki mujh se is qadar bechaargi dekhi nahin jati

zamane bhar ki KHushiyan tere qadmon par luTa dunga

ki mujh se teri aankhon mein nami dekhi nahin jati

lihaz apne baDon ka bhi nahin rakkha hai jo 'faruq'

agar hai is qadar barjastagi dekhi nahin jati