mile kuchh ishq mein itna qarar kam-az-kam

mile kuchh ishq meñ itnā qarār kam-az-kam

hamāre chehroñ pe aa.e nikhār kam-az-kam

sunā.ī dene lage us kī dhaḌkanoñ se sadā

kisī se itnā to ho ham ko pyaar kam-az-kam

ham apne ḳhvāb kī ta.abīr kuchh nikāleñ kyā

ki ek lamha to ho pā.edār kam-az-kam

mire chaman meñ ḳhizāñ rakh chukī qadam lekin

mire ḳhayāl ko miltī bahār kam-az-kam

tamām umr kī naqadī meñ dekhiye sāhab

do-chār lamhe to hoñ ḳhush-gavār kam-az-kam

chunī vo rāhguzar jis taraf nahīñ jaanā

ho apne dil pe hameñ iḳhtiyār kam-se-kam

ham us kī yaad ko rakh kar sirhāne baiThe haiñ

kisī tarah to kaTe intizār kam-az-kam

ik-ādh shaḳhs aziyyat-pasand hai lekin

tumhārā hijr kare e'tibār kam-az-kam

mile kuchh ishq mein itna qarar kam-az-kam

hamare chehron pe aae nikhaar kam-az-kam

sunai dene lage us ki dhaDkanon se sada

kisi se itna to ho hum ko pyar kam-az-kam

hum apne KHwab ki tabir kuchh nikalen kya

ki ek lamha to ho paedar kam-az-kam

mere chaman mein KHizan rakh chuki qadam lekin

mere KHayal ko milti bahaar kam-az-kam

tamam umr ki naqadi mein dekhiye sahab

do-chaar lamhe to hon KHush-gawar kam-az-kam

chuni wo rahguzar jis taraf nahin jaana

ho apne dil pe hamein iKHtiyar kam-se-kam

hum us ki yaad ko rakh kar sirhane baiThe hain

kisi tarah to kaTe intizar kam-az-kam

ik-adh shaKHs aziyyat-pasand hai lekin

tumhaara hijr kare e'tibar kam-az-kam