milega dard to darman ki aarzu hogi

milegā dard to darmāñ kī aarzū hogī

tamām umr ġharaz sirf justujū hogī

phir aaj dil se muḳhātab hai shab kā sannāTā

phir aaj sub.h talak un kī guftugū hogī

junūñ kā shaġhl salāmat rafū kī fikr na kar

kise ḳhabar hai ki kab fursat-e-rafū hogī

abhī jaleñge yahāñ aur be-ruḳhī ke charāġh

is anjuman meñ vafā aur surḳh-rū hogī

chalegī baat jahāñ terī kaj-adā.ī kī

mirī vafā bhī to mauzū-e-guftugū hogī

bacheñge barq-e-havādis se āshiyāñ kab tak

ki tez-tar abhī tahrīk-e-rañg-o-bū hogī

mileñge raah meñ aise aise bhī ham-safar 'tābāñ'

qadam qadam jinheñ manzil kī justujū hogī

milega dard to darman ki aarzu hogi

tamam umr gharaz sirf justuju hogi

phir aaj dil se muKHatab hai shab ka sannaTa

phir aaj subh talak un ki guftugu hogi

junun ka shaghl salamat rafu ki fikr na kar

kise KHabar hai ki kab fursat-e-rafu hogi

abhi jalenge yahan aur be-ruKHi ke charagh

is anjuman mein wafa aur surKH-ru hogi

chalegi baat jahan teri kaj-adai ki

meri wafa bhi to mauzu-e-guftugu hogi

bachenge barq-e-hawadis se aashiyan kab tak

ki tez-tar abhi tahrik-e-rang-o-bu hogi

milenge rah mein aise aise bhi ham-safar 'taban'

qadam qadam jinhen manzil ki justuju hogi