milne ka jab maza hai ki dil aap ka mile

milne kā jab mazā hai ki dil aap kā mile

zāhir meñ aap mujh se mile bhī to kyā mile

ye aarzū hai ab na rahe koī aarzū

ye mudda.ā hai ab dil-e-be-mudda.ā mile

detā hai tark-e-ishq-e-butāñ kī salāh tū

vaa.iz ḳhudā kare ki na tujh ko ḳhudā mile

ḳhātir se merī aap uThā.eñ na ġhair ko

mahfil meñ jā mile na mile dil meñ jā mile

dil ḳhaak ho ke baiTh na jaa.e to kyā kare

kūche meñ ġhair ke jo tirā naqsh-e-pā mile

hairāñ khaḌā huā huuñ maiñ sahrā-e-ishq meñ

yāvar nasīb ho to koī rahnumā mile

us gul-badan se yuuñ havas-e-iḳhtilāt hai

gulshan meñ jaise phuul se bād-e-sabā mile

ye gul-ruḳhān-e-dahr vo gul haiñ ki naam ko

jin meñ na ḳhū-e-mahr na bū-e-vafā mile

hai ḳhirqa-o-qabā pe abas nāz-e-imtiyāz

yaksāñ haiñ jabki ḳhaak meñ shāh-o-gadā mile

āshiq kī maut vo hai ki qurbāñ ho jis pe ziist

aur ziist vo ki maut kā jis meñ mazā mile

bejā nahīñ rakhūñ jo maiñ 'mahrūm' apnā naam

mujh se agar na vo but-e-nā-āshnā mile

milne ka jab maza hai ki dil aap ka mile

zahir mein aap mujh se mile bhi to kya mile

ye aarzu hai ab na rahe koi aarzu

ye muddaa hai ab dil-e-be-muddaa mile

deta hai tark-e-ishq-e-butan ki salah tu

waiz KHuda kare ki na tujh ko KHuda mile

KHatir se meri aap uThaen na ghair ko

mahfil mein ja mile na mile dil mein ja mile

dil KHak ho ke baiTh na jae to kya kare

kuche mein ghair ke jo tera naqsh-e-pa mile

hairan khaDa hua hun main sahra-e-ishq mein

yawar nasib ho to koi rahnuma mile

us gul-badan se yun hawas-e-iKHtilat hai

gulshan mein jaise phul se baad-e-saba mile

ye gul-ruKHan-e-dahr wo gul hain ki nam ko

jin mein na KHu-e-mahr na bu-e-wafa mile

hai KHirqa-o-qaba pe abas naz-e-imtiyaz

yaksan hain jabki KHak mein shah-o-gada mile

aashiq ki maut wo hai ki qurban ho jis pe zist

aur zist wo ki maut ka jis mein maza mile

beja nahin rakhun jo main 'mahrum' apna nam

mujh se agar na wo but-e-na-ashna mile