milo to aise andheron ko bhi pata na lage

milo to aise añdheroñ ko bhī pata na lage

chalo to aise ke jismoñ meñ fāsla na lage

maiñ aaj gaañv meñ chhoḌe to jā rahā huuñ tumheñ

duā karo ki mujhe shahr kī havā na lage

ḳhudā vo vaqt na laa.e hamāre bachchoñ par

ki jis ghaḌī unheñ maaoñ kī bhī duā na lage

maiñ us kā zikr kisī aur se nahīñ kartā

kahīñ ye merā ravayya use burā na lage

ye tai kiyā hai ki aisā fasāna likkhūñgā

vo bevafā kisī jumle se bevafā na lage

biThā gayā thā koī aise peḌ ke nīche

ki jis kā ek bhī patta mujhe harā na lage

atā kiye haiñ yuuñ hī us ne rat-jage 'ishrat'

ye zindagī mujhe ḳhvāboñ kā silsila na lage

milo to aise andheron ko bhi pata na lage

chalo to aise ke jismon mein fasla na lage

main aaj ganw mein chhoDe to ja raha hun tumhein

dua karo ki mujhe shahr ki hawa na lage

KHuda wo waqt na lae hamare bachchon par

ki jis ghaDi unhen maon ki bhi dua na lage

main us ka zikr kisi aur se nahin karta

kahin ye mera rawayya use bura na lage

ye tai kiya hai ki aisa fasana likkhunga

wo bewafa kisi jumle se bewafa na lage

biTha gaya tha koi aise peD ke niche

ki jis ka ek bhi patta mujhe hara na lage

ata kiye hain yun hi us ne rat-jage 'ishrat'

ye zindagi mujhe KHwabon ka silsila na lage