milte hain kahan KHud ko hum be-KHud-e-gham tanha

milte haiñ kahāñ ḳhud ko ham be-ḳhud-e-ġham tanhā

ham se bhī milā denā mil jaa.eñ jo ham tanhā

us aag kā ik sho'la duniyā ke liye kaafī

ik 'umr se jalte haiñ jis aag meñ ham tanhā

ai gardish-e-daurāñ tū us vaqt kī sāthī hai

jab ham ne zamāne meñ rakkhā thā qadam tanhā

ehsās-e-anā kyā hai ehsās-e-vajūd apnā

ham ko na chhuḌā ham se rah jā.eñge ham tanhā

saaqī hai na sahbā hai kyā daur 'shamīm' aayā

maiḳhāne meñ baiThe haiñ bā-dīda-e-nam tanhā

milte hain kahan KHud ko hum be-KHud-e-gham tanha

hum se bhi mila dena mil jaen jo hum tanha

us aag ka ek sho'la duniya ke liye kafi

ek 'umr se jalte hain jis aag mein hum tanha

ai gardish-e-dauran tu us waqt ki sathi hai

jab hum ne zamane mein rakkha tha qadam tanha

ehsas-e-ana kya hai ehsas-e-wajud apna

hum ko na chhuDa hum se rah jaenge hum tanha

saqi hai na sahba hai kya daur 'shamim' aaya

maiKHane mein baiThe hain ba-dida-e-nam tanha