gar kuchh ho dard aaina yun charKH-e-zisht mein

gar kuchh ho dard ā.īna yuuñ charḳh-e-zisht meñ

in sūratoñ ko sirf kare ḳhāk-o-ḳhisht meñ

rakhtā hai soz-e-ishq se dozaḳh meñ roz-o-shab

le jā.egā ye soḳhta-dil kyā bahisht meñ

āsūda kyūñke huuñ maiñ ki mānind-e-gard-bād

āvārgī tamām hai merī sarisht meñ

kab tak ḳharāb sa.ī-e-tavāf-e-haram rahūñ

dil ko uThā ke baiTh rahūñgā kunisht meñ

mātam ke huuñ zamīn pe ḳhirman to kyā ajab

hotā hai niil charḳh kī us sabz kisht meñ

sarmast ham haiñ āñkhoñ ke dekhe se yaar kī

kab ye nasha hai duḳhtar-e-raz tujh palisht meñ

rindoñ ke ta.iiñ hamesha malāmat kare hai tū

ājā.iyo na shaiḳh kahīñ hasht-bahisht meñ

naame ko chaak kar ke kare nāma-bar ko qatl

kyā ye likhā thā 'mīr' marī sar-navisht meñ

gar kuchh ho dard aaina yun charKH-e-zisht mein

in suraton ko sirf kare KHak-o-KHisht mein

rakhta hai soz-e-ishq se dozaKH mein roz-o-shab

le jaega ye soKHta-dil kya bahisht mein

aasuda kyunke hun main ki manind-e-gard-baad

aawargi tamam hai meri sarisht mein

kab tak KHarab sai-e-tawaf-e-haram rahun

dil ko uTha ke baiTh rahunga kunisht mein

matam ke hun zamin pe KHirman to kya ajab

hota hai nil charKH ki us sabz kisht mein

sarmast hum hain aankhon ke dekhe se yar ki

kab ye nasha hai duKHtar-e-raz tujh palisht mein

rindon ke tain hamesha malamat kare hai tu

aajaiyo na shaiKH kahin hasht-bahisht mein

name ko chaak kar ke kare nama-bar ko qatl

kya ye likha tha 'mir' mari sar-nawisht mein