kar nala-kashi kab tain auqat guzaren

kar nāla-kashī kab ta.iiñ auqāt guzāreñ

fariyād kareñ kis se kahāñ jā ke pukāreñ

har-dam kā bigaḌnā to kuchh ab chhūTā hai in se

shāyad kisī nākām kā bhī kaam sañvāreñ

dil meñ jo kabhū josh-e-ġham uThtā hai to tā-der

āñkhoñ se chalī jaatī haiñ dariyā kī sī dhāreñ

kyā zulm hai us ḳhūnī-e-ālam kī galī meñ

jab ham ga.e do-chār na.ī dekheñ mazāreñ

jis jā ki ḳhas-o-ḳhār ke ab Dher lage haiñ

yaañ ham ne unheñ āñkhoñ se dekheñ haiñ bahāreñ

kyūñkar ke rahe sharm mirī shahr meñ jab aah

nāmūs kahāñ utreñ jo dariyā pe izāreñ

ve hoñT ki hai shor-e-masīhā.ī kā jin kī

dam leveñ na do-chār ko tā jī se na māreñ

manzūr hai kab se sar-e-shorīda kā denā

chaḌh jaa.e nazar koī to ye bojh utāreñ

bālīñ pe sar ik 'umr se hai dast-e-talab kā

jo hai so gadā kis kane jā haath pasāreñ

un logoñ ke to gard na phir sab haiñ libāsī

sau gaz bhī jo ye phāḌeñ to ik gaz bhī na vāreñ

nā-chār ho ruḳhsat jo mañgā bhejī to bolā

maiñ kyā karūñ jo 'mīr'-jī jaate haiñ sudhāreñ

kar nala-kashi kab tain auqat guzaren

fariyaad karen kis se kahan ja ke pukaren

har-dam ka bigaDna to kuchh ab chhuTa hai in se

shayad kisi nakaam ka bhi kaam sanwaren

dil mein jo kabhu josh-e-gham uThta hai to ta-der

aankhon se chali jati hain dariya ki si dhaaren

kya zulm hai us KHuni-e-alam ki gali mein

jab hum gae do-chaar nai dekhen mazaren

jis ja ki KHas-o-KHar ke ab Dher lage hain

yan hum ne unhen aankhon se dekhen hain bahaaren

kyunkar ke rahe sharm meri shahr mein jab aah

namus kahan utren jo dariya pe izaren

we honT ki hai shor-e-masihai ka jin ki

dam lewen na do-chaar ko ta ji se na maren

manzur hai kab se sar-e-shorida ka dena

chaDh jae nazar koi to ye bojh utaren

baalin pe sar ek 'umr se hai dast-e-talab ka

jo hai so gada kis kane ja hath pasaren

un logon ke to gard na phir sab hain libasi

sau gaz bhi jo ye phaDen to ek gaz bhi na waren

na-chaar ho ruKHsat jo manga bheji to bola

main kya karun jo 'mir'-ji jate hain sudhaaren