kahe hai kohkan kar fikr meri KHasta-haali mein

kahe hai kohkan kar fikr merī ḳhasta-hālī meñ

ilāhī shukr kartā huuñ tirī dargāh 'aalī meñ

maiñ vo pazhmurda sabza huuñ ki ho kar ḳhaak se sarzad

yakāyak aa gayā us āsmāñ kī pā.emālī meñ

tū sach kah rang paañ hai ye ki ḳhuun ishq-bāzāñ hai

suḳhan rakhte haiñ kitne shaḳhs tere lab kī laalī meñ

burā kahnā bhī merā ḳhush na aayā us ko to varna

tasallī ye dil-e-nāshād hotā ek gaalī meñ

mire ustād ko firdaus-e-a.alā meñ mile jaagā

paḌhāyā kuchh na ġhair-az-ishq mujh ko ḳhurd-sālī meñ

ḳharābī 'ishq se rahtī hai dil par aur nahīñ rahtā

nihāyat 'aib hai ye is dayār-e-ġham ke vaalī meñ

nigāh-e-chashm pur-ḳhashm-e-butāñ par mat nazar rakhnā

milā hai zahr ai dil is sharāb-e-portugalī meñ

sharāb-e-ḳhūn bin taḌpūñ se dil labrez rahtā hai

bhare haiñ sañg-reze maiñ nai is mīnā-e-ḳhālī meñ

ḳhilāf un aur ḳhūbāñ ke sadā ye jī meñ rahtā hai

yahī to 'mīr' ik ḳhūbī hai ma.ashūq-e-ḳhayālī meñ

kahe hai kohkan kar fikr meri KHasta-haali mein

ilahi shukr karta hun teri dargah 'ali mein

main wo pazhmurda sabza hun ki ho kar KHak se sarzad

yakayak aa gaya us aasman ki paemali mein

tu sach kah rang pan hai ye ki KHun ishq-bazan hai

suKHan rakhte hain kitne shaKHs tere lab ki lali mein

bura kahna bhi mera KHush na aaya us ko to warna

tasalli ye dil-e-nashad hota ek gali mein

mere ustad ko firdaus-e-ala mein mile jaga

paDhaya kuchh na ghair-az-ishq mujh ko KHurd-sali mein

KHarabi 'ishq se rahti hai dil par aur nahin rahta

nihayat 'aib hai ye is dayar-e-gham ke wali mein

nigah-e-chashm pur-KHashm-e-butan par mat nazar rakhna

mila hai zahr ai dil is sharab-e-portugali mein

sharab-e-KHun bin taDpun se dil labrez rahta hai

bhare hain sang-reze main nai is mina-e-KHali mein

KHilaf un aur KHuban ke sada ye ji mein rahta hai

yahi to 'mir' ek KHubi hai mashuq-e-KHayali mein