garmi se main to aatish-e-gham ki pighal gaya

garmī se maiñ to ātish-e-ġham kī pighal gayā

rātoñ ko rote rote hī joñ sham-e-gul gayā

ham ḳhasta-dil haiñ tujh se bhī nāzuk-mizāj-tar

tevrī chaḌhā.ī tū ne ki yaañ jī nikal gayā

garmi-e-ishq maane nashv-o-numā huī

maiñ vo nihāl thā ki ugā aur jal gayā

mastī meñ chhoḌ dair ko ka.abe chalā thā maiñ

laġhzish baḌī huī thī va-lekin sambhal gayā

saaqī nashe meñ tujh se luñDhā shīsha-e-sharāb

chal ab ki duḳht-e-tāk kā joban to Dhal gayā

har zarra ḳhaak terī galī kī hai be-qarār

yaañ kaun sā sitam-zada maaTī meñ rul gayā

uryāñ tanī kī shoḳhī se dīvāngī meñ 'mīr'

majnūñ ke dasht-e-ḳhār kā dāmāñ bhī chal gayā

garmi se main to aatish-e-gham ki pighal gaya

raaton ko rote rote hi jon sham-e-gul gaya

hum KHasta-dil hain tujh se bhi nazuk-mizaj-tar

tewri chaDhai tu ne ki yan ji nikal gaya

garmi-e-ishq mane nashw-o-numa hui

main wo nihaal tha ki uga aur jal gaya

masti mein chhoD dair ko kabe chala tha main

laghzish baDi hui thi wa-lekin sambhal gaya

saqi nashe mein tujh se lunDha shisha-e-sharab

chal ab ki duKHt-e-tak ka joban to Dhal gaya

har zarra KHak teri gali ki hai be-qarar

yan kaun sa sitam-zada maTi mein rul gaya

uryan tani ki shoKHi se diwangi mein 'mir'

majnun ke dasht-e-KHar ka daman bhi chal gaya