aaj-kal be-qarar hain hum bhi

āj-kal be-qarār haiñ ham bhī

baiTh jā chalne haar haiñ ham bhī

aan meñ kuchh haiñ aan meñ kuchh haiñ

tohfa-e-rozgār haiñ ham bhī

man'-e-girya na kar tū ai nāseh

is meñ be-iḳhtiyār haiñ ham bhī

darpai-e-jān hai qarāval marg

kisū ke to shikār haiñ ham bhī

naale kariyo samajh ke ai bulbul

baaġh meñ yak kanār haiñ ham bhī

mudda.ī ko sharāb ham ko zahr

āqibat dost-dār haiñ ham bhī

muztarib girya-nāk hai ye gul

barq-e-abr-e-bahār haiñ ham bhī

gar za-ḳhud rafta haiñ tire nazdīk

apne to yādgār haiñ ham bhī

'mīr' naam ik javāñ sunā hogā

usī āshiq ke yaar haiñ ham bhī

aaj-kal be-qarar hain hum bhi

baiTh ja chalne haar hain hum bhi

aan mein kuchh hain aan mein kuchh hain

tohfa-e-rozgar hain hum bhi

man'-e-girya na kar tu ai naseh

is mein be-iKHtiyar hain hum bhi

darpai-e-jaan hai qarawal marg

kisu ke to shikar hain hum bhi

nale kariyo samajh ke ai bulbul

bagh mein yak kanar hain hum bhi

muddai ko sharab hum ko zahr

aaqibat dost-dar hain hum bhi

muztarib girya-nak hai ye gul

barq-e-abr-e-bahaar hain hum bhi

gar za-KHud rafta hain tere nazdik

apne to yaadgar hain hum bhi

'mir' nam ek jawan suna hoga

usi aashiq ke yar hain hum bhi