nale ka aaj dil se phir lab talak guzar hai

naale kā aaj dil se phir lab talak guzar hai

Tak gosh rakhiyo īdhar saath us ke kuchh ḳhabar hai

ai hubb-e-jāh vaalo jo aaj tājvar hai

kal us ko dekhiyo tum ne taaj hai na sar hai

ab kī havā-e-gul meñ sairābī hai nihāyat

jū-e-chaman pe sabza mizhgān-e-chashm-e-tar hai

ai ham-safīr-e-be-gul kis ko dimāġh-e-nāla

muddat huī hamārī minqār-e-zer par hai

sham-e-aḳhīr-e-shab huuñ san sar-guzasht merī

phir sub.h hote tak to qissa hī muḳhtasar hai

ab rahm par usī ke mauqūf hai ki yaañ to

nai ashk meñ sarāyat nai aah meñ asar hai

tū hī zamām apnī naake tuḌā ki majnūñ

muddat se naqsh-e-pā ke mānind raah par hai

ham mast-e-ishq vaa.iz be-hech bhī nahīñ haiñ

ġhāfil jo be-ḳhabar haiñ kuchh un ko bhī ḳhabar hai

ab phir hamārā is kā mahshar meñ mājrā hai

dekheñ to us jagah kyā insāf dād-gar hai

āfat-rasīda ham kyā sar khīñcheñ us chaman meñ

joñ naḳhl-e-ḳhushk ham ko nai saaya nai samar hai

kar 'mīr' us zamīñ meñ aur ik ġhazal to mauzūñ

hai harf-zan qalam bhī ab tab.a bhī idhar hai

nale ka aaj dil se phir lab talak guzar hai

Tak gosh rakhiyo idhar sath us ke kuchh KHabar hai

ai hubb-e-jah walo jo aaj tajwar hai

kal us ko dekhiyo tum ne taj hai na sar hai

ab ki hawa-e-gul mein sairabi hai nihayat

ju-e-chaman pe sabza mizhgan-e-chashm-e-tar hai

ai ham-safir-e-be-gul kis ko dimagh-e-nala

muddat hui hamari minqar-e-zer par hai

sham-e-aKHir-e-shab hun san sar-guzasht meri

phir subh hote tak to qissa hi muKHtasar hai

ab rahm par usi ke mauquf hai ki yan to

nai ashk mein sarayat nai aah mein asar hai

tu hi zamam apni nake tuDa ki majnun

muddat se naqsh-e-pa ke manind rah par hai

hum mast-e-ishq waiz be-hech bhi nahin hain

ghafil jo be-KHabar hain kuchh un ko bhi KHabar hai

ab phir hamara is ka mahshar mein majra hai

dekhen to us jagah kya insaf dad-gar hai

aafat-rasida hum kya sar khinchen us chaman mein

jon naKHl-e-KHushk hum ko nai saya nai samar hai

kar 'mir' us zamin mein aur ek ghazal to mauzun

hai harf-zan qalam bhi ab taba bhi idhar hai