DhunDa na paiye jo is waqt mein sau zar hai

DhūñDā na pā.iye jo is vaqt meñ sau zar hai

phir chaah jis kī mutlaq hai hī nahīñ hunar hai

har-dam qadam ko apne rakh ehtiyāt se yaañ

ye kār-gāh saarī dukkān-e-shīshagar hai

Dhāyā jinnoñ ne us ko un par ḳharābī aa.ī

jaanā gayā usī se dil bhī kaso kā ghar hai

tujh bin shakeb kab tak be-fā.eda huuñ nālāñ

mujh naala kash ke to ai fariyād-ras kidhar hai

said-afgano hamāre dil ko jigar ko dekho

ik tiir kā hadaf hai ik teġh kā sipar hai

ahl-e-zamāna rahte ik taur par nahīñ haiñ

har aan martabe se apne unheñ safar hai

kaafī hai mahr qātil mahzar pe ḳhuuñ ke mere

phir jis jagah ye jaave us jā hī mo'atabar hai

terī galī se bach kar kyuuñ mehr-o-mah na nikleñ

har koī jāntā hai is raah meñ ḳhatar hai

ve din ga.e ki aañsū rote the 'mīr' ab to

āñkhoñ meñ laḳht-e-dil hai yā pāra-e-jigar hai

DhunDa na paiye jo is waqt mein sau zar hai

phir chah jis ki mutlaq hai hi nahin hunar hai

har-dam qadam ko apne rakh ehtiyat se yan

ye kar-gah sari dukkan-e-shishagar hai

Dhaya jinnon ne us ko un par KHarabi aai

jaana gaya usi se dil bhi kaso ka ghar hai

tujh bin shakeb kab tak be-faeda hun nalan

mujh nala kash ke to ai fariyaad-ras kidhar hai

said-afgano hamare dil ko jigar ko dekho

ek tir ka hadaf hai ek tegh ka sipar hai

ahl-e-zamana rahte ek taur par nahin hain

har aan martabe se apne unhen safar hai

kafi hai mahr qatil mahzar pe KHun ke mere

phir jis jagah ye jawe us ja hi mo'atabar hai

teri gali se bach kar kyun mehr-o-mah na niklen

har koi jaanta hai is rah mein KHatar hai

we din gae ki aansu rote the 'mir' ab to

aankhon mein laKHt-e-dil hai ya para-e-jigar hai