kare kya ki dil bhi to majbur hai

kare kyā ki dil bhī to majbūr hai

zamīñ saḳht hai āsmāñ duur hai

jaras-e-rāh meñ jumla-tan shor hai

magar qāfile se koī duur hai

tamannā-e-dil ke liye jaan dī

salīqa hamārā to mash.hūr hai

na ho kis tarah fikr anjām kaar

bharosa hai jis par so maġhrūr hai

palak kī siyāhī meñ hai vo nigāh

kaso kā magar ḳhuun manzūr hai

dil apnā nihāyat hai nāzuk-mizāj

girā gar ye shīsha to phir chuur hai

kahīñ jo tasallī huā ho ye dil

vahī be-qarārī ba-dastūr hai

na dekhā ki lohū thañbā ho kabhū

magar chashm-e-ḳhūñ-bār nāsūr hai

tanik garm tū sañg-reze ko dekh

nihāñ us meñ bhī shola-e-tūr hai

bahut sa'ī kariye to mar rahiye 'mīr'

bas apnā to itnā hī maqdūr hai

kare kya ki dil bhi to majbur hai

zamin saKHt hai aasman dur hai

jaras-e-rah mein jumla-tan shor hai

magar qafile se koi dur hai

tamanna-e-dil ke liye jaan di

saliqa hamara to mashhur hai

na ho kis tarah fikr anjam kar

bharosa hai jis par so maghrur hai

palak ki siyahi mein hai wo nigah

kaso ka magar KHun manzur hai

dil apna nihayat hai nazuk-mizaj

gira gar ye shisha to phir chur hai

kahin jo tasalli hua ho ye dil

wahi be-qarari ba-dastur hai

na dekha ki lohu thanba ho kabhu

magar chashm-e-KHun-bar nasur hai

tanik garm tu sang-reze ko dekh

nihan us mein bhi shola-e-tur hai

bahut sa'i kariye to mar rahiye 'mir'

bas apna to itna hi maqdur hai