ab mir-ji to achchhe zindiq hi ban baiThe

ab 'mīr'-jī to achchhe zindīq hī ban baiThe

peshānī pe de qashqa zunnār pahan baiThe

āzurda dil-e-ulfat ham chupke hī behtar haiñ

sab ro uThegī majlis jo kar ke suḳhan baiThe

uryān phireñ kab tak ai kaash kahīñ aa kar

tā gard bayābāñ kī bālā-e-badan baiThe

paikān-e-ḳhadañg us kā yuuñ siine ke ūdhar hai

joñ mār-e-siyah koī kāḌhe hue phan baiThe

juz ḳhat ke ḳhayāl us ke kuchh kaam nahīñ ham ko

sabzī piye ham aksar rahte haiñ magan baiThe

shamshīr-e-sitam us kī ab go kā chale har-dam

shorīda-sar apne se ham bāñdh kafan baiThe

bas ho to idhar-ūdhar yuuñ phirne na deñ tujh ko

nā-chār tire ham ye dekheñ haiñ chalan baiThe

ab 'mir'-ji to achchhe zindiq hi ban baiThe

peshani pe de qashqa zunnar pahan baiThe

aazurda dil-e-ulfat hum chupke hi behtar hain

sab ro uThegi majlis jo kar ke suKHan baiThe

uryan phiren kab tak ai kash kahin aa kar

ta gard bayaban ki baala-e-badan baiThe

paikan-e-KHadang us ka yun sine ke udhar hai

jon mar-e-siyah koi kaDhe hue phan baiThe

juz KHat ke KHayal us ke kuchh kaam nahin hum ko

sabzi piye hum aksar rahte hain magan baiThe

shamshir-e-sitam us ki ab go ka chale har-dam

shorida-sar apne se hum bandh kafan baiThe

bas ho to idhar-udhar yun phirne na den tujh ko

na-chaar tere hum ye dekhen hain chalan baiThe