taqat nahin hai dil maine ji baja raha hai

tāqat nahīñ hai dil maiñ ne jī bajā rahā hai

kyā naaz kar rahe ho ab ham meñ kyā rahā hai

jeb aur āstīñ se rone kā kaam guzrā

saarā nichoḌ ab to dāman par aa rahā hai

ab chait gar nahīñ kuchh taaza huā huuñ bekal

aayā huuñ jab ba-ḳhud meñ jī is meñ jā rahā hai

kaahe kā paas ab to rusvā.ī duur pahuñchī

rāz-e-mohabbat apnā kis se chhapā rahā hai

gard-e-rah us kī yārab kis aur se uThegī

sau sau ġhazāl har-sū āñkheñ lagā rahā hai

bande to trahdār vhiiñ tarah kash tumhāre

phir chāhte ho kyā tum ab ik ḳhudā rahā hai

dekh us dahan ko har-dam ai aarsī ki yuuñ hī

ḳhūbī kā dar kaso ke muñh par bhī vā rahā hai

ve lutf kī nigāheñ pahle fareb haiñ sab

kis se vo be-muravvat phir āshnā rahā hai

itnā ḳhizāñ kare hai kab zard rañg par yaañ

tū bhī kaso nigah se ai gul judā rahā hai

rahte haiñ daaġh aksar nān-o-namak kī ḳhātir

jiine kā us samayñ meñ ab kyā maza rahā hai

ab chāhtā nahīñ hai bosa jo tere lab se

jiine se 'mīr' shāyad kuchh dil uThā rahā hai

taqat nahin hai dil main ne ji baja raha hai

kya naz kar rahe ho ab hum mein kya raha hai

jeb aur aastin se rone ka kaam guzra

sara nichoD ab to daman par aa raha hai

ab chait gar nahin kuchh taza hua hun bekal

aaya hun jab ba-KHud mein ji is mein ja raha hai

kahe ka pas ab to ruswai dur pahunchi

raaz-e-mohabbat apna kis se chhapa raha hai

gard-e-rah us ki yarab kis aur se uThegi

sau sau ghazal har-su aankhen laga raha hai

bande to trahdar whin tarah kash tumhaare

phir chahte ho kya tum ab ek KHuda raha hai

dekh us dahan ko har-dam ai aarsi ki yun hi

KHubi ka dar kaso ke munh par bhi wa raha hai

we lutf ki nigahen pahle fareb hain sab

kis se wo be-murawwat phir aashna raha hai

itna KHizan kare hai kab zard rang par yan

tu bhi kaso nigah se ai gul juda raha hai

rahte hain dagh aksar nan-o-namak ki KHatir

jine ka us samayn mein ab kya maza raha hai

ab chahta nahin hai bosa jo tere lab se

jine se 'mir' shayad kuchh dil uTha raha hai