KHanjar-ba-kaf wo jab se saffak ho gaya hai

ḳhanjar-ba-kaf vo jab se saffāk ho gayā hai

mulk in sitam-zadoñ kā sab paak ho gayā hai

jis se use lagā.ūñ rūkhā hī ho mile hai

siine meñ jal kar az-bas dil ḳhaak ho gayā hai

kyā jānoñ lazzat-e-dard us kī jarāhatoñ kī

ye jānoñ huuñ ki siina sab chaak ho gayā hai

sohbat se is jahāñ kī koī ḳhalās hogā

is fāhisha pe sab ko imsāk ho gayā hai

dīvār kohna hai ye mat baiTh us ke saa.e

uTh chal ki āsmāñ to kā vaak ho gayā hai

sharm-o-hayā kahāñ kī har baat par hai shamshīr

ab to bahut vo ham se bebāk ho gayā hai

har harf bas-ki royā hai haal par hamāre

qāsid ke haath meñ ḳhat namnāk ho gayā hai

zer-e-falak bhalā to rove hai aap ko 'mīr'

kis kis tarah kā aalam yaañ ḳhaak ho gayā hai

KHanjar-ba-kaf wo jab se saffak ho gaya hai

mulk in sitam-zadon ka sab pak ho gaya hai

jis se use lagaun rukha hi ho mile hai

sine mein jal kar az-bas dil KHak ho gaya hai

kya jaanon lazzat-e-dard us ki jarahaton ki

ye jaanon hun ki sina sab chaak ho gaya hai

sohbat se is jahan ki koi KHalas hoga

is fahisha pe sab ko imsak ho gaya hai

diwar kohna hai ye mat baiTh us ke sae

uTh chal ki aasman to ka wak ho gaya hai

sharm-o-haya kahan ki har baat par hai shamshir

ab to bahut wo hum se bebak ho gaya hai

har harf bas-ki roya hai haal par hamare

qasid ke hath mein KHat namnak ho gaya hai

zer-e-falak bhala to rowe hai aap ko 'mir'

kis kis tarah ka aalam yan KHak ho gaya hai