betabiyon mein tang hum aae hain jaan se

betābiyoñ meñ tang ham aa.e haiñ jaan se

vaqt-e-shakeb ḳhush ki gayā darmiyān se

dāġh-e-farāq-o-hasrat-e-vasl ārzū-e-dīd

kyā kyā liye ga.e tire 'āshiq jahān se

ham hāmushoñ kā zikr thā shab us kī bazm meñ

niklā na harf-e-ḳhair kisū kī zabān se

āb-e-ḳhizar se bhī na ga.ī sozish-e-jigar

kyā jāniye ye aag hai kis dūdmān se

juz 'ishq jañg-e-dahr se mat paḌh ki ḳhush haiñ ham

us qisse kī kitāb meñ us dāstān se

aane kā is chaman meñ sabab bekalī huī

juuñ barq ham taḌap ke gire āshiyān se

ab chheḌ ye rakkhī hai ki 'āshiq hai to kaheñ

al-qissa ḳhush guzartī hai us bad-gumān se

kiine kī mere tujh se na chāhegā koī daad

maiñ kah marūñgā apne har ik mehrbān se

dāġhoñ se hai chaman jigar-e-'mīr' dahr meñ

un ne bhī gul chune bahut us gulsitān se

betabiyon mein tang hum aae hain jaan se

waqt-e-shakeb KHush ki gaya darmiyan se

dagh-e-faraq-o-hasrat-e-wasl aarzu-e-did

kya kya liye gae tere 'ashiq jahan se

hum hamushon ka zikr tha shab us ki bazm mein

nikla na harf-e-KHair kisu ki zaban se

aab-e-KHizar se bhi na gai sozish-e-jigar

kya jaaniye ye aag hai kis dudman se

juz 'ishq jang-e-dahr se mat paDh ki KHush hain hum

us qisse ki kitab mein us dastan se

aane ka is chaman mein sabab bekali hui

jun barq hum taDap ke gire aashiyan se

ab chheD ye rakkhi hai ki 'ashiq hai to kahen

al-qissa KHush guzarti hai us bad-guman se

kine ki mere tujh se na chahega koi dad

main kah marunga apne har ek mehrban se

daghon se hai chaman jigar-e-'mir' dahr mein

un ne bhi gul chune bahut us gulsitan se