chaak par chaak hua jun jun sulaya humne

chaak par chaak huā juuñ juuñ sulāyā ham ne

is garebāñ hī se ab haath uThāyā ham ne

hasrat-e-lutf-e-azīzān-e-chaman jī meñ rahī

sar pe dekhā na gul-o-sarva kā saaya ham ne

jī meñ thā arsh pe jā bāñdhiye takiya lekin

bistara ḳhaak hī meñ ab to bichhāyā ham ne

ba.ad yak umr kahīñ tum ko jo tanhā paayā

Darte Darte hī kuchh ahvāl sunāyā ham ne

yaañ faqat reḳhta hī kahne na aa.e the ham

chaar din ye bhī tamāshā sā dikhāyā ham ne

baare kal baaġh meñ jā murġh-e-chaman se mil kar

ḳhūbī-e-gul kā maza ḳhuub uḌāyā ham ne

tāzgī daaġh kī har shaam ko be-hech nahīñ

aah kyā jaane diyā kis kā bujhāyā ham ne

dasht-o-kohsār meñ sar maar ke chande tujh bin

qais-o-farhād ko phir yaad dilāyā ham ne

bekalī se dil-e-betāb kī mar guzre the

so tah-e-ḳhāk bhī ārām na paayā ham ne

ye sitam taaza huā aur ki pā.īz meñ 'mīr'

dil ḳhas-o-ḳhār se nā-chār lagāyā ham ne

chaak par chaak hua jun jun sulaya hum ne

is gareban hi se ab hath uThaya hum ne

hasrat-e-lutf-e-azizan-e-chaman ji mein rahi

sar pe dekha na gul-o-sarwa ka saya hum ne

ji mein tha arsh pe ja bandhiye takiya lekin

bistara KHak hi mein ab to bichhaya hum ne

baad yak umr kahin tum ko jo tanha paya

Darte Darte hi kuchh ahwal sunaya hum ne

yan faqat reKHta hi kahne na aae the hum

chaar din ye bhi tamasha sa dikhaya hum ne

bare kal bagh mein ja murgh-e-chaman se mil kar

KHubi-e-gul ka maza KHub uDaya hum ne

tazgi dagh ki har sham ko be-hech nahin

aah kya jaane diya kis ka bujhaya hum ne

dasht-o-kohsar mein sar mar ke chande tujh bin

qais-o-farhad ko phir yaad dilaya hum ne

bekali se dil-e-betab ki mar guzre the

so tah-e-KHak bhi aaram na paya hum ne

ye sitam taza hua aur ki paiz mein 'mir'

dil KHas-o-KHar se na-chaar lagaya hum ne