kya mere aane pe tu ai but-e-maghrur gaya

kyā mire aane pe tū ai but-e-maġhrūr gayā

kabhī us raah se niklā to tujhe ghuur gayā

le gayā sub.h ke nazdīk mujhe ḳhvāb ai vaa.e

aañkh us vaqt khulī qāfila jab duur gayā

gor se naale nahīñ uThte to nai ugtī hai

jī gayā par na hamārā sar pur-shor gayā

chashm-e-ḳhūñ-basta se kal raat lahū phir Tapkā

ham ne jaanā thā ki bas ab to ye nāsūr gayā

nā-tavāñ ham haiñ ki haiñ ḳhaak galī kī us kī

ab to be-tāqatī se dil kā bhī maqdūr gayā

le kahīñ muñh pe naqāb apne ki ai ġhairat-e-sub.h

sham.a ke chehra-e-raḳhshāñ se to ab nuur gayā

nāla-e-'mīr' nahīñ raat se sunte ham log

kyā tire kūche se ai shoḳh vo ranjūr gayā

kya mere aane pe tu ai but-e-maghrur gaya

kabhi us rah se nikla to tujhe ghur gaya

le gaya subh ke nazdik mujhe KHwab ai wae

aankh us waqt khuli qafila jab dur gaya

gor se nale nahin uThte to nai ugti hai

ji gaya par na hamara sar pur-shor gaya

chashm-e-KHun-basta se kal raat lahu phir Tapka

hum ne jaana tha ki bas ab to ye nasur gaya

na-tawan hum hain ki hain KHak gali ki us ki

ab to be-taqati se dil ka bhi maqdur gaya

le kahin munh pe naqab apne ki ai ghairat-e-subh

shama ke chehra-e-raKHshan se to ab nur gaya

nala-e-'mir' nahin raat se sunte hum log

kya tere kuche se ai shoKH wo ranjur gaya