mua main sajde mein par naqsh mera bar raha

muā maiñ sajde meñ par naqsh merā baar rahā

us āstāñ pe mirī ḳhaak se ġhubār rahā

junūñ meñ ab ke mujhe apne dil kā ġham hai pe haif

ḳhabar lī jab ki na jaame meñ ek taar rahā

bashar hai vo pe khulā jab se us kā dām-e-zulf

sar-e-rah us ke farishte hī kā shikār rahā

kabhū na āñkhoñ meñ aayā vo shoḳh ḳhvāb kī tarah

tamām-umr hameñ us kā intizār rahā

sharāb-e-aish mayassar huī jise ik shab

phir us ko roz-e-qayāmat talak ḳhumār rahā

butāñ ke 'ishq ne be-iḳhtiyār kar Daalā

vo dil ki jis kā ḳhudā.ī meñ iḳhtiyār rahā

vo dil ki shām-o-sahar jaise pakkā phoḌā thā

vo dil ki jis se hamesha jigar-figār rahā

tamām-umr ga.ī us pe haath rakhte hameñ

vo dardnāk alarraġhm be-qarār rahā

sitam meñ ġham meñ sar-anjām us kā kyā kahiye

hazāroñ hasrateñ thiiñ tis pe jī ko maar rahā

bahā to ḳhuun ho āñkhoñ kī raah bah niklā

rahā jo sīna-e-sozāñ meñ dāġhdār rahā

so us ko ham se farāmosh-kāriyoñ le ga.e

ki us se qatra-e-ḳhūñ bhī na yādgār rahā

galī meñ us kī gayā so gayā na bolā phir

maiñ 'mīr' 'mīr' kar us ko bahut pukār rahā

mua main sajde mein par naqsh mera bar raha

us aastan pe meri KHak se ghubar raha

junun mein ab ke mujhe apne dil ka gham hai pe haif

KHabar li jab ki na jame mein ek tar raha

bashar hai wo pe khula jab se us ka dam-e-zulf

sar-e-rah us ke farishte hi ka shikar raha

kabhu na aankhon mein aaya wo shoKH KHwab ki tarah

tamam-umr hamein us ka intizar raha

sharab-e-aish mayassar hui jise ek shab

phir us ko roz-e-qayamat talak KHumar raha

butan ke 'ishq ne be-iKHtiyar kar Dala

wo dil ki jis ka KHudai mein iKHtiyar raha

wo dil ki sham-o-sahar jaise pakka phoDa tha

wo dil ki jis se hamesha jigar-figar raha

tamam-umr gai us pe hath rakhte hamein

wo dardnak alarraghm be-qarar raha

sitam mein gham mein sar-anjam us ka kya kahiye

hazaron hasraten thin tis pe ji ko mar raha

baha to KHun ho aankhon ki rah bah nikla

raha jo sina-e-sozan mein daghdar raha

so us ko hum se faramosh-kariyon le gae

ki us se qatra-e-KHun bhi na yaadgar raha

gali mein us ki gaya so gaya na bola phir

main 'mir' 'mir' kar us ko bahut pukar raha