dil ke tin aatish-e-hijran se bachaya na gaya

dil ke tiiñ ātish-e-hijrāñ se bachāyā na gayā

ghar jalā sāmne par ham se bujhāyā na gayā

dil meñ rah-e-dil meñ ki me.amār-e-qazā se ab tak

aisā matbū-e-makāñ koī banāyā na gayā

kabhū āshiq kā tire jabhe se nāḳhun kā ḳharāsh

ḳhat-e-taqdīr ke mānind miTāyā na gayā

kyā tunuk-hausla the dīda-o-dil apne aah

ek dam rāz-e-mohabbat kā chhupāyā na gayā

dil jo dīdār kā qātil ke bahut bhūkā thā

us sitam-kushta se ik zaḳhm bhī khāyā na gayā

maiñ to thā said-e-zabūñ said-gah-e-ishq ke beach

aap ko ḳhaak meñ bhī ḳhuub milāyā na gayā

shahr-e-dil-e-āh ajab jaa.e thī par us ke ga.e

aisā ujḌā ki kisī tarah basāyā na gayā

aaj ruktī nahīñ ḳhāme kī zabāñ rakhiye muaaf

harf kā tuul bhī jo mujh se ghaTāyā na gayā

dil ke tin aatish-e-hijran se bachaya na gaya

ghar jala samne par hum se bujhaya na gaya

dil mein rah-e-dil mein ki meamar-e-qaza se ab tak

aisa matbu-e-makan koi banaya na gaya

kabhu aashiq ka tere jabhe se naKHun ka KHarash

KHat-e-taqdir ke manind miTaya na gaya

kya tunuk-hausla the dida-o-dil apne aah

ek dam raaz-e-mohabbat ka chhupaya na gaya

dil jo didar ka qatil ke bahut bhuka tha

us sitam-kushta se ek zaKHm bhi khaya na gaya

main to tha said-e-zabun said-gah-e-ishq ke beach

aap ko KHak mein bhi KHub milaya na gaya

shahr-e-dil-e-ah ajab jae thi par us ke gae

aisa ujDa ki kisi tarah basaya na gaya

aaj rukti nahin KHame ki zaban rakhiye muaf

harf ka tul bhi jo mujh se ghaTaya na gaya