idhar aa kar shikar-afgan hamara

idhar aa kar shikār-afgan hamārā

mushabbak kar gayā hai tan hamārā

garebāñ se rahā kotah to phir hai

hamāre haath meñ dāman hamārā

ga.e joñ sham.a us majlis meñ jitne

sabhoñ par haal hai raushan hamārā

balā jis chashm ko kahte haiñ mardum

vo hai ain-e-balā maskan hamārā

huā rone se rāz-e-dostī faash

hamārā girya thā dushman hamārā

bahut chāhā thā abr-e-tar ne lekin

na minnat-kash huā gulshan hamārā

chaman meñ ham bhī zanjīrī rahe haiñ

sunā hogā kabhū shevan hamārā

kiyā thā reḳhta parda-suḳhan kā

so Thahrā hai yahī ab fan hamārā

na bahke mai-kade meñ 'mīr' kyūñkar

giro sau jā hai pairāhan hamārā

idhar aa kar shikar-afgan hamara

mushabbak kar gaya hai tan hamara

gareban se raha kotah to phir hai

hamare hath mein daman hamara

gae jon shama us majlis mein jitne

sabhon par haal hai raushan hamara

bala jis chashm ko kahte hain mardum

wo hai ain-e-bala maskan hamara

hua rone se raaz-e-dosti fash

hamara girya tha dushman hamara

bahut chaha tha abr-e-tar ne lekin

na minnat-kash hua gulshan hamara

chaman mein hum bhi zanjiri rahe hain

suna hoga kabhu shewan hamara

kiya tha reKHta parda-suKHan ka

so Thahra hai yahi ab fan hamara

na bahke mai-kade mein 'mir' kyunkar

giro sau ja hai pairahan hamara