jab junun se hamein tawassul tha

jab junūñ se hameñ tavassul thā

apnī zanjīr-e-pā hī kā ġhul thā

bistara thā chaman meñ joñ bulbul

naala sarmāya-e-tavakkul thā

yak nigah ko vafā na kī goyā

mausam-e-gul safīr-e-bulbul thā

un ne pahchān kar hameñ maarā

muñh na karnā idhar tajāhul thā

shahr meñ jo nazar paḌā us kā

kushta-e-nāz yā taġhāful thā

ab to dil ko na taab hai na qarār

yād-e-ayyām jab tahammul thā

jā phañsā dām-e-zulf meñ āḳhir

dil nihāyat hī be-tāmmul thā

yuuñ ga.ī qad ke ḳham hue jaise

umr ik rahrav sar-e-pul thā

ḳhuub daryāft jo kiyā ham ne

vaqt-e-ḳhush 'mīr' nik.hat-e-gul thā

jab junun se hamein tawassul tha

apni zanjir-e-pa hi ka ghul tha

bistara tha chaman mein jon bulbul

nala sarmaya-e-tawakkul tha

yak nigah ko wafa na ki goya

mausam-e-gul safir-e-bulbul tha

un ne pahchan kar hamein mara

munh na karna idhar tajahul tha

shahr mein jo nazar paDa us ka

kushta-e-naz ya taghaful tha

ab to dil ko na tab hai na qarar

yaad-e-ayyam jab tahammul tha

ja phansa dam-e-zulf mein aaKHir

dil nihayat hi be-tammul tha

yun gai qad ke KHam hue jaise

umr ek rahraw sar-e-pul tha

KHub daryaft jo kiya hum ne

waqt-e-KHush 'mir' nikhat-e-gul tha