naqqash dekh to main kya naqsh-e-yar khincha

naqqāsh dekh to maiñ kyā naqsh-e-yār khīñchā

us shoḳh kam-numā kā nit intizār khīñchā

rasm-e-qalamrav-e-ishq mat pūchh kuchh ki nāhaq

ekoñ kī khaal khīñchī ekoñ ko daar khīñchā

thā bad-sharāb saaqī kitnā ki raat mai se

maiñ ne jo haath khīñchā un ne kaTār khīñchā

mastī meñ shakl saarī naqqāsh se khiñchī par

āñkhoñ ko dekh us kī āḳhir ḳhumār khīñchā

jī khiñch rahe haiñ ūdhar aalam kā hogā balva

gar shāne tū ne us kī zulfoñ kā taar khīñchā

thā shab kise kasā.e teġh-e-kashīda-kaf meñ

par maiñ ne bhī baġhal baġhal be-iḳhtiyār khīñchā

phirtā hai 'mīr' to jo phāḌe hue garebāñ

kis kis sitam-zade ne dāmāñ yaar khīñchā

naqqash dekh to main kya naqsh-e-yar khincha

us shoKH kam-numa ka nit intizar khincha

rasm-e-qalamraw-e-ishq mat puchh kuchh ki nahaq

ekon ki khaal khinchi ekon ko dar khincha

tha bad-sharab saqi kitna ki raat mai se

main ne jo hath khincha un ne kaTar khincha

masti mein shakl sari naqqash se khinchi par

aankhon ko dekh us ki aaKHir KHumar khincha

ji khinch rahe hain udhar aalam ka hoga balwa

gar shane tu ne us ki zulfon ka tar khincha

tha shab kise kasae tegh-e-kashida-kaf mein

par main ne bhi baghal baghal be-iKHtiyar khincha

phirta hai 'mir' to jo phaDe hue gareban

kis kis sitam-zade ne daman yar khincha