hai haal jae girya-e-jaan par aarzu ka

hai haal jaa.e giryā-e-jāñ par aarzū kā

ro.e na ham kabhū Tak dāman pakaḌ kaso kā

jaatī nahīñ uThā.ī apne pe ye ḳhushūnat

ab rah gayā hai aanā merā kabhū kabhū kā

us āstāñ se kis din pur-shor sar na paTkā

us kī galī meñ jā kar kis raat maiñ na kuukā

shāyad ki muñd ga.ī hai qamrī kī chashm-e-giryāñ

kuchh TuuT sā chalā hai paanī chaman kī jū kā

apne taḌapne kī to tadbīr pahle kar luuñ

tab fikr maiñ karūñgā zaḳhmoñ ke bhī rafū kā

dāñtoñ kī nazm us ke hañsne meñ jin ne dekhī

phir motiyoñ kī laḌ par un ne kabhū na thūkā

ye aish-gā nahīñ hai yaañ rañg aur kuchh hai

har gul hai is chaman meñ sāġhar bharā lahū kā

bulbul ġhazal-sarā.ī aage hamāre mat kar

sab ham se sīkhte haiñ andāz guftugū kā

galiyāñ bharī paḌī haiñ ai baad zaḳhmiyoñ se

mat khol pech zālim us zulf-e-mushk-bū kā

ve pahlī iltifāteñ saarī fareb niklīñ

denā na thā dil us ko maiñ 'mīr' aah chaukā

hai haal jae girya-e-jaan par aarzu ka

roe na hum kabhu Tak daman pakaD kaso ka

jati nahin uThai apne pe ye KHushunat

ab rah gaya hai aana mera kabhu kabhu ka

us aastan se kis din pur-shor sar na paTka

us ki gali mein ja kar kis raat main na kuka

shayad ki mund gai hai qamri ki chashm-e-giryan

kuchh TuT sa chala hai pani chaman ki ju ka

apne taDapne ki to tadbir pahle kar lun

tab fikr main karunga zaKHmon ke bhi rafu ka

danton ki nazm us ke hansne mein jin ne dekhi

phir motiyon ki laD par un ne kabhu na thuka

ye aish-ga nahin hai yan rang aur kuchh hai

har gul hai is chaman mein saghar bhara lahu ka

bulbul ghazal-sarai aage hamare mat kar

sab hum se sikhte hain andaz guftugu ka

galiyan bhari paDi hain ai baad zaKHmiyon se

mat khol pech zalim us zulf-e-mushk-bu ka

we pahli iltifaten sari fareb niklin

dena na tha dil us ko main 'mir' aah chauka