main bhi duniya mein hun ek nala-pareshan yak ja

maiñ bhī duniyā meñ huuñ ik nāla-pareshāñ yak jā

dil ke sau TukḌe mire par sabhī nālāñ yak jā

pand-goyoñ ne bahut siine kī tadbīreñ liiñ

aah sābit bhī na niklā ye garebāñ yak jā

terā kūcha hai sitamgār vo kāfir jāgah

ki jahāñ maare ga.e kitne musalmāñ yak jā

sar se bāñdhā hai kafan ishq meñ tere ya.anī

jam.a ham ne bhī kiyā hai sar-o-sāmāñ yak jā

kyūñke paḌte haiñ tire paañv nasīm-e-saharī

us ke kūche meñ hai sad ganj-e-shahīdāñ yak jā

tū bhī rone ko milā dil hai hamārā bhī bharā

hoje ai abr bayābān meñ giryāñ yak jā

baiTh kar 'mīr' jahāñ ḳhuub na royā hove

aisī kūche meñ nahīñ hai tire jānāñ yak jā

main bhi duniya mein hun ek nala-pareshan yak ja

dil ke sau TukDe mere par sabhi nalan yak ja

pand-goyon ne bahut sine ki tadbiren lin

aah sabit bhi na nikla ye gareban yak ja

tera kucha hai sitamgar wo kafir jagah

ki jahan mare gae kitne musalman yak ja

sar se bandha hai kafan ishq mein tere yani

jama hum ne bhi kiya hai sar-o-saman yak ja

kyunke paDte hain tere panw nasim-e-sahari

us ke kuche mein hai sad ganj-e-shahidan yak ja

tu bhi rone ko mila dil hai hamara bhi bhara

hoje ai abr bayaban mein giryan yak ja

baiTh kar 'mir' jahan KHub na roya howe

aisi kuche mein nahin hai tere jaanan yak ja