paigham gham-e-jigar ka gulzar tak na pahuncha

paiġhām ġham-e-jigar kā gulzār tak na pahuñchā

naala mirā chaman kī dīvār tak na pahuñchā

us ā.īne ke mānind zañgār jis ko khāve

kaam apnā us ke ġham meñ dīdār tak na pahuñchā

joñ naqsh-e-pā hai ġhurbat hairān-kār us kī

āvāra ho vatan se jo yaar tak na pahuñchā

labrez shikva the ham lekin huzūr tere

kār-e-shikāyat apnā guftār tak na pahuñchā

le chashm-e-nam-rasīdd paanī chuvāne koī

vaqt-e-aḳhīr us ke bīmār tak na pahuñchā

ye baḳhte--sabz dekho bāġh-e-zamāna meñ se

pazhmurda gul bhī apnī dastār tak na pahuñchā

mastūrī ḳhūb-rūī donoñ na jam.a hoveñ

ḳhūbī kā kaam kis kī iz.hār tak na pahuñchā

yūsuf se le ke tā-gul phir gul se le ke tā-shamma

ye husn kis ko le kar bāzār tak na pahuñchā

afsos 'mīr' ve jo hone shahīd aa.e

phir kaam un kā us kī talvār tak na pahuñchā

paigham gham-e-jigar ka gulzar tak na pahuncha

nala mera chaman ki diwar tak na pahuncha

us aaine ke manind zangar jis ko khawe

kaam apna us ke gham mein didar tak na pahuncha

jon naqsh-e-pa hai ghurbat hairan-kar us ki

aawara ho watan se jo yar tak na pahuncha

labrez shikwa the hum lekin huzur tere

kar-e-shikayat apna guftar tak na pahuncha

le chashm-e-nam-rasidd pani chuwane koi

waqt-e-aKHir us ke bimar tak na pahuncha

ye baKHte--sabz dekho bagh-e-zamana mein se

pazhmurda gul bhi apni dastar tak na pahuncha

masturi KHub-rui donon na jama howen

KHubi ka kaam kis ki izhaar tak na pahuncha

yusuf se le ke ta-gul phir gul se le ke ta-shamma

ye husn kis ko le kar bazar tak na pahuncha

afsos 'mir' we jo hone shahid aae

phir kaam un ka us ki talwar tak na pahuncha