gul sharm se bah jaega gulshan mein ho kar aab sa

gul sharm se bah jā.egā gulshan meñ ho kar aab sā

burqe se gar niklā kahīñ chehra tirā mahtāb sā

gul-e-barg kā ye rañg hai marjāñ kā aisā Dhañg hai

dekho na jhumke hai paḌā vo hoñT la.al-e-nāb sā

vo māya-e-jāñ to kahīñ paidā nahīñ joñ kīmiyā

maiñ shauq kī ifrāt se betāb huuñ sīmāb sā

dil taab hī laayā na Tuk tā yaad rahtā ham-nashīñ

ab aish roz-e-vasl kā hai jī meñ bhūlā ḳhvāb sā

sanñāhaTe meñ jaan ke hosh-o-havās-o-dam na thā

asbāb saarā le gayā aayā thā ik sailāb sā

ham sar-kashī se muddatoñ masjid se bach bach kar chale

ab sajde hī meñ guzre hai qad jo huā mehrāb sā

thī ishq kī vo ibtidā jo mauj sī uTThī kabhū

ab dīda-e-tar ko jo tum dekho to hai girdāb sā

bahke jo ham mast aa ga.e sau baar masjid se uThā

vaa.iz ko maare ḳhauf ke kal lag gayā jullāb sā

rakh haath dil par 'mīr' ke daryāft kar kyā haal hai

rahtā hai aksar ye javāñ kuchh in dinoñ betāb sā

gul sharm se bah jaega gulshan mein ho kar aab sa

burqe se gar nikla kahin chehra tera mahtab sa

gul-e-barg ka ye rang hai marjaan ka aisa Dhang hai

dekho na jhumke hai paDa wo honT lal-e-nab sa

wo maya-e-jaan to kahin paida nahin jon kimiya

main shauq ki ifraat se betab hun simab sa

dil tab hi laya na Tuk ta yaad rahta ham-nashin

ab aish roz-e-wasl ka hai ji mein bhula KHwab sa

sannahaTe mein jaan ke hosh-o-hawas-o-dam na tha

asbab sara le gaya aaya tha ek sailab sa

hum sar-kashi se muddaton masjid se bach bach kar chale

ab sajde hi mein guzre hai qad jo hua mehrab sa

thi ishq ki wo ibtida jo mauj si uTThi kabhu

ab dida-e-tar ko jo tum dekho to hai girdab sa

bahke jo hum mast aa gae sau bar masjid se uTha

waiz ko mare KHauf ke kal lag gaya jullab sa

rakh hath dil par 'mir' ke daryaft kar kya haal hai

rahta hai aksar ye jawan kuchh in dinon betab sa